Bordi i Shoqatës Ndërkombëtare të Futbollit, IFAB, pranoi propozimin e FIFA për të ndryshuar përkohësisht rregulloren e futbollit dhe të lejojë pesë zëvendësime. Kjo zgjidhje është menduar prej zhvillimit të ndeshjeve në një kohë shumë të shkurtër.
Një gjë e tillë do të ndikojë në performancat fizike të skuadrave, duke mos harruar këtu edhe një vështirësi tjetër, temperaturat e larta. Serie A ishte e para që pranoi një propozim të tillë, teksa e njëjta gjë ka ndodhur edhe me Bundesligën gjermane.
Kicker raporton se DFB (Federate Gjermane e Futbollit) kanë rënë dakord me idenë e FIFA-s, pas Asamblesë ku morën pjesë 36 klubet e dy divizioneve të larta të futbollit gjerman. Të gjithë trajnerët e skuadrave gjermane do të kenë mundësinë të bëjnë pesë ndërrime gjatë një ndeshje.
Jo vetëm kaq pasi për të shmangur vonesat, është vendosur që ekipet të kenë tre mundësi për të bërë zëvendësime. Kështu trajnerët mund të bëjnë dy ndërrime njëherësh. Në takim u vendos që Federata do të ketë fuqi për datat e fundit të sezonit dhe për datat e fillimit të sezonit të ardhshëm. /abcnews.al
