Pesë muaj pasi Organizata Botërore e Shëndetësisë shpalli koronavirusin pandemi globale, numri i rasteve të Covid-19 në të gjithë botën po i afrohet 20 milionëve.
Sipas të dhënave të fundit janë rreth 730 mijë viktima të konfirmuara. Numri aktual i infektimeve, sipas universitetit Johns Hopkins, është 19.792.519 me një mesatare ditore rastesh të reja prej më shumë se 250 mijë.
Rastet globale, janë dyfishuar në vetëm gjashtë javë dhe janë rritur 200 herë më shumë krahasuar me mesin e marsit. Viktimat janë rritur nga më shumë se 4 mijë në shkallë globale në kohën kur OBSH shpalli pandeminë në më shumë se 730 mijë tani.
SHBA, të dielën kapërceu 5 milion infektime, zë ¼ e rasteve totale globale e po ashtu atje shënohet edhe një në pesë viktimat e Covidit në botë, çdo ditë. SHBA është vendi më i prekur në botë sa i takon rasteve ashtu edhe viktimave.
Një në çdo 65 amerikanë ka rezultuar pozitiv për koronavirusin ndërsa një në 2000 ka humbur jetën nga Covid-19 që nga fillimi i pandemisë. Brazili, me më shumë se 3 milion infektime është vendi i dytë më i prekur në botë. Të dielën vendi regjistroi një rekord të zymtë me numrin e viktimave që shkoi në mbi 100 mijë.
Kina, vendi ku virusi u shfaq në fund të dhjetorit 2019, raportoi së fundmi vetëm 14 raste infektimesh lokale në 24 orët e shkuara. Ndërkohë që 35 raste të reja ishin sjellë në vend nga kinezë që ktheheshin nga vende të tjera. Ka tani 29 shtete të botës me bilance më të rënda se Kina.
