Përshtatnin ambientet e lokaleve për lojërat e fatit, 11 të arrestuar në Tiranë

schedule09:09 - 10 Korrik, 2024

schedule 09:09 - 10 Korrik, 2024

11 persona janë arrestuar këtë të mërkurë në Tiranë, pasi dyshohet se përshtatnin ambientet e lokaleve për lojërat e fatit.

Po ashtu është shpallur në kërkim një 40-vjeçar, si dhe janë proceduar në gjendje të lirë dy të tjerë.

Gjatë operacionit të koduar “Big Match” , u sekuestruan 3 celularë që shërbenin për ushtrimin e lojërave të fatit, 224 000 lekë të rinj dhe 2720 euro, të dyshuara të përfituara nga kjo veprimtari e paligjshme.

Sektori për Hetimin e Krimeve Kibernetike, në vijim të punës për goditjen e veprimtarive të paligjshme të lojërave të fatit, në kuadër të një procedimi penal të vitit 2024, ndjekur me metoda speciale të hetimit, në bashkëpunim me Sektorin e Forcës për Operacionet Speciale dhe Kërkimin, dhe Sektorin e Forcës së Posaçme “Shqiponja”, ka finalizuar operacionin policor të koduar “Big Match”.

Në kuadër të këtij operacioni, pas një pune hetimore të mirorganizuar, janë identifikuar subjekte dhe shtetas të dyshuar, që kryejnë aktivitetin e paligjshëm të organizimit dhe përshtatjes së ambienteve për lotari sportive.

Gjithashtu, janë proceduar në gjendje të lirë shtetasit 23 vjeç, dhe 28 vjeç. Po në kuadër të këtij operacioni u shpall në kërkim shtetasi 40 vjeç.

Gjatë kontrolleve të ushtruara në lokale të ndryshme në Tiranë, të cilat ishin përshtatur për organizimin e lotarive të palejuara, këta shtetas janë kapur në flagrancë duke ushtruar veprimtarinë e paligjshme të lojërave të fatit.

Gjatë operacionit janë sekuestruar 13 celularë që shërbenin për ushtrimin e lojërave të fatit, 224 000 lekë të rinj dhe 2720 euro, të dyshuara të përfituara nga kjo veprimtari e paligjshme.

Materialet procedurale i kaluan Prokurorisë, për veprime të mëtejshme.“, thuhet në njoftimin e policisë.

/abcnews.al