Për disa ditë, Libani ka qenë dëshmitar i protestave kundër bllokimit nga COVID-19 dhe asaj që protestuesit e përshkruajnë si paaftësi e qeverisë për të ndaluar përhapjen e virusit derisa spitalet arrijnë kapacitetin maksimal.
Së paku 226 persona u plagosën në përplasjet midis protestuesve dhe forcave të sigurisë në Tripoli në veri të kryeqytetit libanez, Bejrut.
Forcat e sigurisë u përpoqën t’i shpërndajnë duke përdorur gaz lotsjellës, ndërsa demonstruesit u përgjigjën me gurë, kokteje molotovi dhe fishekzjarrë.
Granata dore u hodhën ndaj forcave të sigurisë dhe dy prej tyre shpërthyen, theksuan Forcat e brendshme të sigurisë së Libanit në twitter. Gjithashtu raportohet se të paktën nëntë persona u plagosën dhe automjetet ushtarake u dëmtuan për shkak të granatave të dorës.
Kryqi i Kuq libanez tha se 35 persona u transportuan në spitale dhe 67 të tjerë u trajtuan në vendin e ngjarjes.
Ndërkohë, agjencia shtetërore e lajmeve (NNA) njoftoi se 31 nga 124 personat e plagosur të trajtuar nga Njësitë libaneze të reagimit të urgjencës u transferuan në spitale.
Të paktën 226 njerëz u plagosën. Qeveria libaneze njoftoi se do të zgjasë orën policore deri më 8 shkurt si pjesë e masave për të ndaluar përhapjen e koronavirusit.
Ndërkohë ushtria libaneze tha se 31 ushtarë u plagosën për shkak të një sulmi nga protestuesit në qytetin e Tripolit, ndërsa pesë protestues u arrestuan.
Numri i të infektuarve me COVID-19 në Liban arriti në 289.660, duke përfshirë 2.553 viktima dhe 171.177 të shëruar./abcnews.al
