Loading ...
Gjykata e Shkodrës ka vendosur lirimin me masën e sigurisë “detyrim për t’u paraqitur” për dy të rinjtë, Klevin Thepi, 24 vjeç, dhe Doronesto Kulla, 19 vjeç.
Ata janë të dyshuar si organizatorët kryesorë të rrahjes masive mes adoleshentësh, e ndodhur disa ditë më parë pranë shkollës së mesme “Shejnaze Juka”, në qytetin e Shkodrës.
Prokuroria e Shkodrës ka kërkuar vleftësimin e ligjshëm të arrestit të dy të rinjve dhe ka kërkuar masën e sigurisë “arrest me burg”, ndërsa gjykata i la “detyrim paraqitje”.
Pamjet e kamerave të sigurisë tregojnë se sherri ka nisur fillimisht me përplasje të dhunshme fizike e më pas është përshkallëzuar me përdorimin e thikës.
Dy vëllezërit e plagosur u transportuan në spital dhe ndodhen jashtë rrezikut për jetën.
Policia thotë se adoleshentët janë konfliktuar për motive të dobëta dhe bashkë me prokurorinë po punon për dokumentimin e plotë të rastit.
Kjo ngjarje në Shkodër vjen pak ditë pas ngjarjes së rëndë në Durrës ku një 15 vjeçar humbi jetën pas goditjes me thikë nga një bashkëmoshatar./abcnews.al
