Ekstradohet nga Greqi drejt vendit tonë Afrim Kocaqi, 44 vjeç, banues në Fier, i cili ishte shpallur në kërkim për pastrim parash.
Gjykata e Shkallës së Parë Fier në vitin 2014 e ka dënuar 44 vjeçarin me 4 vite burgim për veprën penale “Pastrimi i produkteve të veprës penale”.
Nga hetimet paraprake ka rezultuar se Afrim Kocaqi (mbiemri i mëparshëm Muço), ka kryer derdhje cash të shumës prej 3.100.000 lekë në një bankë të nivelit të dytë në Tiranë, veprim financiar pa asnjë përshkrim justifikues i kryer në vitin 2011. Pas regjistrimit të procedimit penal është vendosur sekuestro preventive mbi shumat monetare që gjendeshin në këtë bankë, që në momentin e sekuestrimit ishin 2.500.000 lekë.
Kocaqi rezulton një person i njohur për autoritetet greke. Së bashku me tre persona të tjerë në vitin 2011 ka kryer vjedhjen e bankës në Egjira Greqi nëpërmjet përdorimit të armëve të zjarrit .
Pas dënimit të kryer në shtetin grek, ai ekstradohet për shlyerjen e dënimit të mësipërm të vendosur nga autoritetet tona gjyqësore.
