Këtë muaj u vendosen rekorde globale të temperaturave, një shenjë alarmuese e ndryshimit të klimës, veçanërisht përballë fenomenit El Niño, i cili mund ta bëjë vitin 2023 vitin më të nxehtë të regjistruar.
Për muajin qershor, temperaturat mesatare globale janë, deri më tani, pothuajse një gradë Celsius më të larta se vlerat përkatëse të regjistruara që nga viti 1979. Ekspertët e fushës theksojnë se këto temperatura mund ta bëjnë vitin 2023 vitin më të nxehtë të regjistruar, duke tejkaluar vitin 2016.
Ngrohja e shkaktuar nga djegia e lëndëve djegëse fosile pritet të përkeqësohet nga “El Niño”, një fenomen natyror në të cilin ngrohen pjesë të Oqeanit Paqësor, duke shkaktuar një rritje prej 0,1 deri në 0,2 gradë Celsius në temperaturën mesatare globale.
Në një deklaratë javën e kaluar, Administrata Amerikane e Oqeanit dhe Atmosferës konfirmoi praninë e “El Nino”, ndërsa parashikoi gjithashtu përshkallëzimin e tij të vazhdueshëm deri në fillim të vitit të ardhshëm.
“Temperatura e sipërfaqes globale po formohet deri në nivele rekord dhe 2023 është pothuajse e sigurt se do të jetë viti më i ngrohtë i regjistruar”, tha Michael Mann, një ekspert i ndryshimeve klimatike në Universitetin e Pensilvanisë.
Këtë vit janë regjistruar valë të forta të nxehtit dhe temperatura rekord nga Porto Riko në Siberi, ndërsa nxehtësia ekstreme duket se ka ndikuar edhe në zjarret e mëdha në Kanada që mbuluan qiejt e Nju Jorkut dhe Uashingtonit me tym toksik. Shkencëtarët paralajmërojnë se efektet në rritje të krizës klimatike janë tashmë të qarta dhe nuk do të zvogëlohen derisa të ketë një reduktim rrënjësor të emetimeve.
“Pa zvogëlime në emetime, ndryshimet që po shohim janë vetëm fillimi”, tha Natalie Mahowald, një shkencëtare atmosferike në Universitetin Cornell. “Ky vit dhe ekstremet që kemi parë deri më tani janë një paralajmërim.”
