Problemi i rënies së natalitetit duhet të zgjidhet në nivel institucional dhe nënat nuk duhet të vendosen në pozicionin për të zgjedhur mes punës dhe kujdesit për fëmijët e tyre, tha këtë të premte, kreu i Kishës Katolike Romake, Papa Françesku.
“Në nivel institucional, ka nevojë të menjëhershme për politika efektive, zgjedhje të guximshme, konkrete dhe afatgjata”, tha Papa Françesku në një konferencë mbi lindjet në Romë.
Ai theksoi se përkushtimi i qeverive botërore është i domosdoshëm për të ndihmuar të rinjtë të arrijnë qëllimet e tyre, transmeton Ansa.
Papa shtoi se është thelbësore që nënat të mos duhet të zgjedhin midis punës dhe fëmijëve dhe se çiftet e reja duhet të çlirohen nga shqetësimet për shkak të mungesës së të ardhurave dhe papunësisë.
“Një shkencëtar më tha se investimet më fitimprurëse janë fabrikat e armëve dhe kontraceptivëve. Njëra shkatërron, e tjetra parandalon jetën, gjë që është jashtëzakonisht e keqe”, tha Papa Françesku./abcnews.al
