Në këshillin bashkiak të Tiranë për herë të parë ka dhe një pjesëtar nga komuniteti rom.
Ai është Sead Kazanxhiu, i cili zëvendësoi Besard Kadinë që u dorëhoq pas emërimit si Ambasador në Azerbajxhan.
“Është lufta ime personale, por edhe e komunitetit rom për të qenë pjesë e vendimmarrjes. Edhe pse ne romët jetojmë prej shekujsh në territorin e Shqipërisë jemi një komunitet i integruar në shoqërinë shqiptare edhe pse shpesh kjo çështja integrimit keqkuptohet, por nuk kemi pasur asnjëherë përfshirje.”
37 vjeçari nga fshati Baltëz i Fierit vjen nga një familje me gjashtë anëtarë. Nga babai të cilit në klasë të gjashtë iu desh të shkëputej nga shkolla për të ndihmuar familjen dëgjonte shpesh.
“Nuk dua që ju të kaloni atë që kam kaluar unë”.
U diplomua në Akademinë e Arteve në Tiranë për pikturë dhe më pas u largua drejt Budapestit për të studiuar gjuhën rome. Megjithë shkollimin e tij tregon se betejat nuk i ka pasur të lehta.
“Shumë të vështira sepse duke qenë pjesë e komunitetit rom ti duhet të provosh veten dyfish. Unë e kam hasur dhe vetë diskriminimin institucional. Në fund të fundit ti mbetesh rom për dikë dhe pse mund të jesh super i edukuar, por unë i kam hedhur poshtë viktimizimet e kam ecur para, kam luftuar me veten, se lufta më e madhe është të mundësh veten.”
Tentativat si artist dhe më pas si aktivist për tu përfshirë në vendimmarrje për çështje që i takonin komunitetit që përfaqëson thotë se ishin të pamjaftueshme, kështu vendosi të angazhohej në politikë.
“Jam angazhuar përmes PS dhe kam kandiduar si këshilltar në Bashkinë e Tiranës në zgjedhjet e kaluara, nuk është se jam vendosur në një listë fituese ndaj kam qëndruar në stolin rezervë për dy vite, por mendoj se është një mundësi shumë e mirë për të gjithë komunitetin rom dhe partitë politike për të përfshirë anëtar të pakicave në listat e tyre”.
Edhe pse i vetëdijshëm për pozicionin e tij në listë nuk u tërhoq. Në bisedë me veten tregon se dominoi mendimi.
“Thosha nëse unë jap dorëheqjen do thuhet ne ja dhamë mundësinë romëve dhe romët nuk e duan u tërhoqën.”
Tashmë që është pjesë e këshillit bashkiak të Tiranës Seadi thotë se në mendje përherë do të ketë porosinë e prindërve
“Për të ngritur zërin për të gjitha pakicat kombëtare në Shqipëri. Porosia më e madhe është qëndroni sa më të pastër, qëndroni mos të viheni me gisht nga askush tjetër”.
