Operacioni ndërkombëtar “Rekrutuesi” mundësoi arrestimin në Spanjë të shtetasit Leonard Luzi.
Mësohet se 47-vjeçari në bashkepunim edhe me tre persona te tjerë, tentuan te ekzekutonin një vit më parë, Ervis Matodashaj dhe Inez Hajrulla, pas konflikteve për lojërat e fatit. Fatmirësisht, ky krim u parandalua fal ndërhyrjes së policisë.
Ndërkohë, në momentin e arrestimit, Luzit iu sekuestrua pistoleta me fishek në fole, e gatshme për qitje.
Njoftimi i Policisë:
Si rezultat i operacionit të koduar “Rekrutuesi”, arrestohet në Spanjë, 47-vjeçarit Leonard Luzi që akuzohet nga GjKKO-ja se rreth 1 vit më parë, në Vlorë, kishte organizuar vrasjen e 2 shtetasve (krim i parandaluar si rezultat i ndërhyrjes së Policisë).
Në bazë të informacionit nga strukturat e Policisë së Shtetit dhe shkëmbimit të menjëhershëm të tij, ndërmjet Interpol Tiranës dhe Interpol Madridit, në lidhje me vendndodhjen e një shtetasi të kërkuar ndërkombëtarisht, për sigurim kushtesh/mjetesh për të kryer vrasje, u finalizua operacioni policor i koduar “Rekrutuesi”.
Në kuadër të këtij operacioni u arrestua në Spanjë, shtetasi 47 vjeç, i lindur në Vlorë.
Gjykata e Posaçme e Shkallës së Parë për Korrupsionin dhe Krimin e Organizuar, më datë 05.02.2024, i ka caktuar këtij shtetasi masën e sigurisë “Arrest në burg”, për veprat penale “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal” dhe “Mbajtja pa leje dhe prodhimi i armëve shpërthyese dhe municionit”.
47-vjeçari akuzohet se më datë 08.08.2023, në bashkëpunim me të tjerë, kishte organizuar vrasjen e dy shtetasve. Ky krim u parandalua nga Policia, pasi u arrestua shtetasi i cili dyshohet se i paguar prej shtetasit do të kryente vrasjet. Shtetasit në momentin e arrestimit, iu sekuestrua pistoleta me fishek në fole, e gatshme për qitje.
Vijon bashkëpunimi për të finalizuar ekstradimin e shtetasit në Shqipëri.
