Kundërshtarët e presidentit venezuelas, Nicolas Maduro, protestuan më 28 gusht në përpjekje për të ringjallur protestat kundër tij, teksa presidenti po forcon pushtetin pas zgjedhjeve të kontestuara të muajit të kaluar.
Protesta në kryeqytetin venezuelas, Karakas, u mbajt një muaj pas zgjedhjeve të 28 korrikut, në të cilat Maduro shpalli fitore pavarësisht dëshmive se kandidati opozitar, Edmundo Gonzalez i fitoi ato. Komuniteti ndërkombëtar ka dënuar zgjedhjet duke thënë se ka pasur mungesë të transparencës.
Që nga mbajtja e zgjedhjeve ka pasur protesta, por protestat e organizuara nga opozita deri më tani nuk kanë prodhuar ndonjë rezultat. Kundërshtarët e Maduros kërkojnë që zyrtarët zgjedhorë të publikojnë rezultatet e secilit vendvotim, pasi thonë se në këtë mënyrë do të ekspozoheshin përpjekjet e Maduros për të vjedhur zgjedhjet.
Po më 28 gusht, mbështetësit e Maduros kanë paralajmëruar protesta, teksa janë zotuar se “do të mbrojnë” fitoren e Maduros. Ata thonë se protestat e opozitës janë përpjekje për trazira në këtë shtet në Amerikën Jugore.
Për shkak të krizës, Maduro po varet shumë nga forcat e sigurisë për të ruajtur pushtetin. Të martën, ai emëroi shefin e partisë së tij të linjës së ashpër në postin e ministrit të Brendshëm, dikaster që mbikëqyrë forcat policore. Diosdado Cabello është zotuar se nuk do të ketë mëshirë ndaj kundërshtarëve të Qeverisë.
Emërimi i Cabellos në postin e ministrit të Brendshëm nxiti frikë se shtypja e protestave do të intensifikohet, teksa deri më tani në protestat e organizuara kundër rezultatit zgjedhor janë arrestuar më shumë se 2.000 persona, përfshirë gazetarë, politikanë dhe studentë. /rel
