Operohet me sukses në zemër bebja me peshën më të vogël në Shqipëri. Një foshnje 30 ditëshe 2.9 kilogram u paraqit me urgjencë në Pediatrinë e Qendrës Spitalore “Nënë Tereza” në Tiranë.
Mjekët zbuluan se vuante nga ndërprerja e harkut të aortës. Ndonëse një diagnozë e vështirë vendosën ta fusin në sallën e operacionit.
“Është fëmija më i vogël në peshë që kemi operuar në Shqipëri gjatë këtyrë viteve 2.9 kilogram, ka shkuar shumë mirë. Pati një post kirurgji rreth 2 javë në reanimacion të Pediatrisë, por problemi për të cilin erdhi u zgjidh dhe ky është një sukses për kardiokirurgjinë shqiptare. Pesha sigurisht është domethënëse, determinante për daljen me sukses të operacionit. Sa më të vegjël aq më të rrezikuar janë dhe aq më i vështirë është manipulimi i të gjithë indeve, bëhet fjalë për milimetra.”- u shpreh Altin Veshti, shefi i Kardiokirurgjisw nw QSUT.
Vitet e fundit sipas shefit të shërbimit kardiokirurgjisë në QSUT Altin Veshti mjekët po diagnostikojnë më shumë fëmijë me probleme të lindura në zemër.
Shumica e tyre riparohen dhe 98% e operacioneve të kryera kanë rezultuar të suksesshme.
“Rreth 95% e defekteve riparohen me një zemër normale, një pjesë tejtër 5-10% anatomia nuk kthehet asnjëherë normale , por fiziologjia po. Bebi rritet dhe bën jetë normale, ndoshta me disa limit në sporte.
Defekti më i shpeshtë është ajo që populli i thotë vrima në zemër, komunikimi mes anës së majtë dhe të djathtë të zemrës.”- u shpreh Veshti.
Në Shqipëri kryehen rreth 95 % e ndërhyrjeve në zemër tek fëmijët ndërsa për 5% të tyre mjekët e Qendrës Spitalore “Nënë Tereza” në Tiranë kanë lidhur marrëveshje me dy qendra në Itali ku foshnjat sipas shefit të kardiokirurgjisë operohen pa pagesë nga familja. / abcnews.al
