Organizata e Kombeve të Bashkuara i kërkoi qeverisë izraelite të pezullojë reformën e shpallur në drejtësi pasi mund të dobësojë në mënyrë drastike të drejtat e njeriut në vend.
Miliona izraelitë kanë dalë në protesta në qytetet kryesore të vendit ku i kanë kërkuar qeverisë Netanjahu që të tërhiqet nga kjo nismë. Asambleja Kombëtare e Izraelit ka ndërmarrë një hap të ri drejt miratimit të propozimit të qeverisë, që ndër të tjera nënkupton se përfaqësuesit e zgjedhur të vendit mund të anulojnë vendimet e Gjykatës së Lartë me shumicë të thjeshtë.
Komisioneri i Lartë i Kombeve të Bashkuara për të Drejtat e Njeriut, Volker Turk, beson se ndryshimet do të dobësojnë pavarësinë e gjyqësorit, sigurinë ligjore dhe të drejtat e njeriut të izraelitëve.
Mediat vendase publikuan edhe sondazhe me opinionin e qytetarëve për këtë reformë në sistemin e drejtësisë, sipas të cilave 53% e kundërshtojnë atë. Por edhe vetë mediat janë të ndara, me një pjesë që flasin për mbështetje të qeverisë e një pjesë kundër saj.
/abcnews.al
