Rreth 9,000 pacientë të bllokuar në Gaza kanë nevojë urgjente për trajtim jashtë vendit, tha të shtunën Drejtori i Përgjithshëm i Organizatës Botërore të Shëndetësisë, Tedros Adhanom Ghebreyesus.
Me infrastrukturën e kujdesit shëndetësor të shembur në Gaza, Tedros tha se mijëra kishin nevojë të trajtoheshin për kancerin dhe dializën e veshkave, si dhe për lëndimet gjatë konfliktit.
Tedros tha se më shumë se 3,400 janë evakuuar tashmë, por shumë të tjerë duhet të presin miratimin izraelit për t’u larguar.
“Ne i bëjmë thirrje Izraelit të përshpejtojë miratimet për evakuime, në mënyrë që pacientët kritikë të mund të trajtohen,” tha ai. “Çdo moment ka rëndësi.”
Zyra e OKB-së për Koordinimin e Çështjeve Humanitare tha të premten se spitalet pjesërisht funksionale të Gazës mund të ofrojnë vetëm “shërbime të kufizuara” dhe janë të mbingarkuar me pacientë.
Ata po përballen gjithashtu me “mungesa kritike të karburantit, ilaçeve, furnizimeve mjekësore dhe personelit shëndetësor”.
Ai shtoi se më shumë se 400 sulme në infrastrukturën e kujdesit shëndetësor në Rripin e Gazës ishin dokumentuar nga OBSH që nga 12 marsi, duke prekur rreth 100 ambulanca dhe gati 100 objekte shëndetësore.
/abcnews.al
