Presidenti rus Vladimir Putin ka urdhëruar që kompania e naftës së papërpunuar dhe gazit “Wintershall Dea” në Gjermani dhe kompania e naftës “OMV” me bazë në Austri të përjashtohen nga aksionet shumë miliarda dollarësh në projektet e nxjerrjes së gazit në Arktik.
Sipas dekreteve presidenciale, aksionet nga OMV dhe Wintershall Dea në fushën Yuzhno-Russkoye dhe në projektet e Achimov do t’u kthehen kompanive të reja ruse.
Sekuestrimi më i madh i aseteve të huaja të Kremlinit në Rusi, vjen pas asaj që Putin e quan si një shpallje të luftës ekonomike nga Perëndimi pas vendimit të Rusisë për të dërguar mijëra trupa në Ukrainë në shkurt 2022.
Sipërmarrësit rusë kanë fituar kontrollin mbi disa asete të mëdha perëndimore në Rusi, duke përfshirë tetë fabrikat e birrës të Carlsberg, si dhe ndërmarrjet e prodhuesit francez të kosit Danone.
Asetet shtetërore ruse me vlerë qindra miliarda dollarë janë ngrirë në Perëndim, ashtu si edhe pasuritë e biznesmenëve dhe investitorëve rusë. Gjermania vitin e kaluar mori kontrollin e një rafinerie kryesore të naftës Schwedt në pronësi ruse, e cila furnizon 90% të karburantit të Berlinit.
Dekretet e Putinit zyrtarizojnë një humbje të kontrollit që BASF dhe Wintershall Dea kanë shënuar që nga janari 2023. Sipas njoftimit për shtyp, masa e marrë ishte për të mbrojtur interesat kombëtare mes veprimeve të paligjshme dhe jomiqësore të Perëndimit në lidhje me asetet ruse.
BASF dhe Wintershall Dea kanë thënë se asetet ruse të Wintershall Dea, të cilat përbënin rreth gjysmën e prodhimit të saj, janë shpronësuar në mënyrë efektive nga shteti dhe duheshin shlyer.
Wintershall Dea, një sipërmarrje e përbashkët midis BASF dhe firmës së investimeve të miliarderit rus Mikhail Fridman, LetterOne, është në proces të largimit nga Rusia. OMV u tërhoq vitin e kaluar.
BASF tha të mërkurën se kompania mësoi këtë informacion nga lajmet dhe aktualisht po analizonte situatën në detaje. Kompania raportoi një humbje neto në vitin 2022 të dëmtuar nga një zhvlerësim prej 7.3 miliardë eurosh i shkaktuar kryesisht nga dekonsolidimi i Wintershall Dea AG në Rusi.
OMV fillimisht pritej të pësonte humbje prej 1.5-1.8 miliardë euro (1.64-1.97 miliardë dollarë) nga tërheqja ruse.
Të gjitha aktivitetet me pjesëmarrjen ruse, duke përfshirë aksionet e Wintershall Dea në tubacionin Nord Stream, si dhe sipërmarrjet e përbashkëta me prodhuesin e gazit Gazprom do të ndahen ligjërisht deri në mesin e vitit 2024.
Si fusha Yuzhno-Russkoye ashtu edhe projektet Achimov ndodhen në rajonin Yamal-Nenets në veriun e largët të Rusisë.
Sipas dekreteve, aksionet në projektet e Achimov do t’i transferohen kompanive të krijuara posaçërisht me përgjegjësi të kufizuar dhe më pas do t’i ofrohen për vlerësim dhe shitje një kompanie pak të njohur të quajtur Gazovyye Tekhnologii.
Pasuritë e OMV-së do t’i shiten më pas shoqërisë aksionare SOGAZ, e cila ofron sigurime për Gazprom. Të ardhurat nga shitjet do të vendosen në llogari të veçanta në pronësi të ish-pronarëve të tyre të huaj. Të gjitha marrëveshjet e korporatës në fuqi më parë nuk janë më të vlefshme, sipas dekreteve.
/abcnews.al
