Dhuna dhe abuzimet seksuale po kthehen në një fenomen shqetësues. Akoma më shqetësues mbetet fakti se viktimat ndjehen të pambrojtura duke sjellë në këtë mënyrë edhe frikë për të denoncuar rastet.
Si ngacmimi seksual, ashtu edhe abuzimi seksual ndikon zhvillimin e vlerësimit për veten, dëmton zhvillimin e personalitetit, socializimin me të tjerët si në moshën e fëmijëve, por edhe në moshën e adoleshencën.
Psikologia njëherësh ish-deputetja e PD, Orjola Pampuri e ftuar në “ABC-ja e mëngjesit” foli për abuzimet, si duhet të reagojmë dhe përse është e rëndësishme që të komunikojmë me fëmijët.
Pampuri theksoi se problem mbetet paragjykimi, ndërsa shtoi se duhet më shumë mbështetje dhe se duhet që situata të tilla të trajtohen.
“Komunikimi është shumë i rëndësishëm, por duhet të tregohet kujdes edhe për ndryshimet e sjelljeve që fëmija pëson. Fëmijët janë shumë të ndjeshëm. Të gjitha reagimet duhet të bëhen në një formë alerte. Në vendin tonë ka një handikap shumë të madh, pasi një psikolog duhet të jetë përgjegjës për tre shkolla dhe kjo është e vështirë. Një rol të rëndësishëm luan edhe mësuesi, i cili herë pas here merr rolin e një psikologu. Ajo që është e dhimbshme, në rastet që unë kam pasur ajo që i prekte më shumë prindërit ishte paragjykimi, dhe për këtë arsye, ne nëpërmjet fushatave duhet të nxisim më shumë mbështetje. Sistemet e referimit duhet të jenë më të forta, sistemet mbështetëse duhet të jenë më të sigurta. Pasi mund të referohet rasti, por personi në fjalë mund të ndjehet i pambrojtur dhe kjo sjell edhe frikën për të reaguar”, tha Pampuri.
Pjesë e këtij diskutimi u bë edhe përfaqësuesja e UNICEF, Ina Verzivolli.
Në një lidhje me ABC-ja e mëngjesit”, Verzivolli foli për fushatën sensibilizuese, “Të besoj” duke treguar se qëllimi kryesor është të sjellë reagim të personave të abuzuar.
“Ajo që duam të bëjmë është të shkundim një mentalitet që toleron dhunën. Kur ndodh brenda familjes dhe synon të mos dalë jashtë mureve është një situatë. Është vënë re se pas transmetimit të rasteve publike, shumë qytetarë reaguan dhe treguan raste të abuzimeve seksuale dhe nga ky fakt morën edhe një nxitje për krijimin e kësaj lëvizje. Duhet të thyejmë mentalitetin se dhuna nuk tregohet. Po ashtu i është lënë mundësia personave që nuk duan të identifikohen dhe është vënë në dispozicion adresa e emaili-t. Fëmijët dhe prindërit kanë frikë për të raportuar abuzimet për shkak se dyshojnë se do të marrin mbështetje”, u shpreh ajo.
Sakaq Pampuri gjatë bisedës në studio tha se fëmija është shumë i aftë të memorizojë fragmente apo detaje, të rëndësishme apo jo, dhe këtu duhet treguar kujdes, pasi sipas saj ka shumë fëmijë të abuzuar që thjesht janë distancuar për shkak se ka munguar mbështetja.
“Në një situatë të tillë, tek fëmija krijohen edhe pasoja për këtë arsye duhet të realizohen terapi për këta fëmijë”, tha ajo.
Pampuri shtoi se e ardhmja e këtyre fëmijë të abuzuar nuk do të jetë e thjeshtë nëse nuk trajtohen: Fëmija nuk e ka të thjeshtë nëse nuk do të marrë trajtimin duhur. Një traumë e tillë do të lërë pasoja nëse nuk është trajtuar./abcnews.al/
