Loading ...
Gjashtë javë kanë mbetur për t’u mbyllur gara në Abissnet Superiore, ndërkohë që të premten do të ketë ndeshje të tjera të rëndësishme për llogari të javës së 31-të.
Takimi i parë luhet mes Laçit dhe Tiranës, në orën 16:45. Bardhebluve u mjafton një pikë që të shpallen matematikisht kampionë, ndërkohë kurbinasit duan fitoren për të siguruar sa më parë Europën nga kampionati.
Çështja e titullit është e mbyllur, por pritet një ndeshje e luftuar pasi luhet edhe për prestigj. Në mbrëmje, nga ora 19:45, do të luhen dy takime të tjera. Derbi Partizani-Dinamo, në “Elbasan Arena”, është njëra sfidë, kurse në Durrës Teuta pret Kukësin.
Dy ndeshjet e fundit të javës së 31-të luhen të dielën, prej orës 19:45. Vllaznia do kërkojë tre pikët ndaj Skënderbeut të vendit të fundit, me shpresën që edhe të rifitojë ndonjë pozicion në renditje duke parë duelet e rivalëve, ndërsa në Kamzë Kastrioti-Egnatia është një duel mes dy skuadrave që duan të shmangin zonën “play-out” për rënien nga Superiorja. / abcnews.al
