Nën drejtimin e presidentit Bajram Begaj ka nisur mbledhja e Këshillit të Sigurisë Kombëtare. Këshilli do të analizojë gjendjen e sigurisë kombëtare dhe prioritetet për 2023.
“Viti që lamë pas ishte i vështirë dhe sfidues për sigurinë kombëtare. Sulmi kibernetik shkaktoi probleme në infrastrukturat dixhitale. Në aspektin rajonal ka përpjekje nga shtete me interesa jomiqësore për frenimin euroatlantik të tij” mësohet të jetë shprehur Begaj në mbledhjen e Këshillit, që po mbahet me dyer të mbyllura.
Vëmendje në fjalën e kreut të Shtetit ka marrë edhe Kosova.
“Shqipëria do të vijojë të jetë në krah të Kosovës për ruajtjen e paprekshëmrisë dhe integritetit territorial të saj” u shpreh Begaj, ndërsa shtoi se: “Agresioni i paligjshëm i Rusisë ndaj Ukrainës ka shkaktuar krizën më të madhe të sigurisë në hapësirën euro-atlantike.
Efektet e këtij agresioni u shoqëruan me rritje të konsiderueshme çmimesh në sektorin ushqimor dhe të energjisë të cilat kanë shtrenjtuar dhe vështirësuar jetën e qytetarëve” në vijim kreu i shteti foli për angazhimi gjithpërfshirës institucional për të siguruar bashkërendimin dhe përdorimin efikas të burimeve kombëtare në funksion të sigurisë, lirisë dhe mirëqenies
Tre janë çështjet qe pritet te diskutohen ne kete mbledhje: E dyta është lufta në Ukrainë, pasojat që ajo sjellë në vendin tonë që lidhen me energjinë apo edhe drithërat. Dhe pika e tretë është situata në Kosovë. Tensionet mes Kosovës dhe Serbisë në veri dhe fakti që një grup nga Shqipëria është një pjes e KFOR për ruajtjen e paqes. E para ka të bëjë me sulmet kibernetike nga Irani, përballimin e situatës dhe sa shqetësuese vazhdon të jetë.
Fjala e plotë e Presidentit në mbledhjen e Këshillit të Sigurisë Kombëtare:
Siç jeni njoftuar, bazuar në pikën 3, të nenit 168 të Kushtetutës së Republikës së Shqipërisë dhe nenin 10 të ligjit 64/2014 “Për pushtetet dhe autoritetet e drejtimit dhe komandimit strategjik të Forcave të Armatosura të Republikës së Shqipërisë” (i ndryshuar), kam thirrur këtë mbledhje të Këshillit të Sigurimit Kombëtar.
Pikësëpari, më lejoni T’ju falënderoj për pjesëmarrjen, informimin e vijueshëm dhe të vlefshëm që i keni bërë Institucionit të Presidentit të Republikës dhe mbi të gjitha, për punën e bërë në mbrojtjen dhe garantimin e sigurisë kombëtare të Republikës së Shqipërisë.
Viti që sapo kemi lënë pas ishte i vështirë dhe sfidues edhe për sigurinë tonë kombëtare. Në muajin korrik, ne u përballëm me një nga sulmet më të rënda kibernetike të sponsorizuar nga struktura shtetërore të Republikës Islamike të Iranit, i cili jo vetëm shkaktoi probleme në infrastrukturën digjitale në vend, por ishte me qëllime të dukshme politike për të shkaktuar destabilitet.
Gjatë vitit 2022 kemi kaluar situata të vështira që lidhen me përmbytjet gjatë periudhës së dimrit; situatë e vështirë është krijuar dhe këto dy javët e fundit, si dhe zjarret gjatë periudhës së verës. Gjithashtu ka patur cënim të sigurisë publike nga fenomene të kriminalitetit, aktivitete të paligjshme të trafikut të lëndëve narkotike, krimit të organizuar, korrupsionit, emigracionit etj. Të gjitha këto kanë ndikuar negativisht në zhvillimin ekonomik dhe rritjen e mirëqënies së qytetarëve.
Në aspektin rajonal ka patur zhvillime me ndikim direkt apo indirekt në ruajtjen dhe mbrojtjen e interesave tona kombëtare, ndërkohë që shtete me interesa jo miqësore, nëpërmjet instrumentave të ndryshëm janë përpjekur të zgjerojnë influencën e tyre dhe të frenojnë proceset integruese euro-atlantike të vendeve të rajonit tonë.
Përgjatë gjithë vitit dhe në fund të dhjetorit të vitit të kaluar, u ballafaquam me një situatë tepër delikate në veri të Kosovës, e cila nuk kontribuon në paqen dhe stabilitetin rajonal. Shqipëria është në krah të Kosovës dhe vlerëson ruajtjen e paprekshmërisë dhe integritetit territorial të Republikës së Kosovës, vlerëson rolin dhe kontributin e misionit KFOR të NATOs në garantimin e paqes dhe sigurisë, respekton parimet e fqinjësisë së mirë, si dhe mbështet dhe inkurajon dialogun Serbi-Kosovë të ndërmjetësuar nga Bashkimi Evropian dhe mbështetur nga SHBA, për arritjen e një marrëveshje përfundimtare, që do të çojë në njohje të ndërsjelltë.
Agresioni i paligjshëm i Rusisë ndaj Ukrainës ka shkaktuar krizën më të madhe të sigurisë në hapësirën euro-atlantike, ndërsa efektet e tij në fushën ekonomike u shoqëruan me rritje të konsiderueshme çmimesh në sektorin ushqimor dhe të energjisë të cilat kanë shtrenjtuar dhe vështirësuar jetën e qytetarëve.
Në këtë takim të sotëm, ne do bëjmë një analizë të gjendjes së sigurisë kombëtare dhe ajo ç’ka është më e rëndësishme është të diskutojmë prioritet për vitin në vijim, në funksion të një angazhimi të plotë dhe gjithpërfshirës të të gjitha institucioneve, për të siguruar bashkërendimin e përpjekjeve dhe përdorimin efikas të burimeve kombëtare në funksion të sigurisë, lirisë dhe mirëqenies/ r.t/abcnews.al
