Loading ...Jeta e Bejdo Malos është një rrëfim i rrallë që ndërthur ushtrinë, sportin dhe gazetarinë në një histori të vetme përkushtimi. I lindur në Malëshovë të Përmetit dhe i rritur me disiplinën e një familjeje ushtarake, ai nisi herët rrugën e formimit në shkollën “Skënderbegas”, për të vijuar më pas me gjithçka që lidhej me ushtrinë deri në moshën 23-vjeçare.
Por pas uniformës, erdhi pena. Që nga viti 1981 e deri më sot, Bejdo Malo mbetet një zë i pranishëm në gazetari, duke kaluar nga media e shkruar tek ekrani televiziv, me një përvojë që rrallëkush e ka.
Ai ruan një respekt të veçantë për brezin e ri, ndonëse pranon se gazetaria e sotme nuk i ngjan asaj të dikurshmes. Dashuria për librin është një tjetër shtyllë e jetës së tij, me një bibliotekë prej mbi 7500 titujsh.
Në jetën personale, ai gjen forcën te familja – bashkëshortja, “bashkëvuajtësja” e tij, fëmijët, nipërit dhe mbesat që i japin kuptim çdo sakrifice. Por përtej gjithçkaje, Bejdo Malo mbetet një shpirt i lidhur me natyrën. Me mbi 300 vazo lulesh, ai gjen qetësinë dhe harmoninë që e ka shoqëruar gjatë gjithë jetës. Sepse në fund, rrugëtimi i tij është dëshmi se pasioni dhe përkushtimi ndërtojnë një jetë të plotë.
