Kryeministri Benjamin Netanyahu tha në një fjalim të ri se “IDF ka hyrë në Gaza më thellë sesa kishte imagjinuar ndonjëherë Hamasi” dhe paralajmëroi Hezbollahun e Libanit se do të bënte “gabimin më të madh të jetës së tij” nëse hapte një front të ri lufte me Izraelin.
Duke folur nga selia ushtarake Kirya në Tel Aviv, Netanyahu tha se po i drejtohej kombit për të informuar izraelitët për luftën.
“Në jug, lufta po vazhdon me një forcë që Hamasi nuk e ka parë kurrë,” tha ai. “Qyteti i Gazës është i rrethuar. Ne po operojmë brenda saj, duke rritur presionin mbi Hamasin orë pas ore, ditë pas dite”.
Ai deklaroi se mijëra terroristë janë vrarë, si mbi tokë ashtu edhe në tunele, duke përfshirë shumë nga ata që planifikuan dhe kryen masakrën e 1400 njerëzve në Izrael më 7 tetor.
Netanyahu theksoi gjithashtu se operacioni tokësor ka shkatërruar qendra komanduese, pozicione dhe tunele “të panumërta” të Hamasit.
“Hamasi po zbulon se ne po arrijmë në vende që ata mendonin se nuk do t’i arrinim kurrë,” tha ai.
Netanyahu vuri në dukje se trupat e IDF-së po “marrin mësime” brenda Rripit, të cilat ua transferojnë trupave që trajnojnë brenda Izraelit përpara se të hyjnë në Gaza. Ai vlerësoi gjithashtu besnikërinë dhe vendosmërinë e trupave izraelite në mbrojtjen e vendit.
Në veri IDF po mbrohet dhe po sulmon në të njëjtën kohë. “Izraeli nuk do të lejojë që Hamasi apo Hezbollahu në Liban të dëmtojnë komunitetet dhe qytetarët tanë”.
“Ne do t’i përgjigjemi me zjarr të fortë çdo sulmi të tyre kundër nesh. Nëse Hezbollahu shkon në luftë, do të bëjë gabimin më të madh të jetës së tij”, paralajmëroi ai.
Në lidhje me pengjet që mbahen në Gaza, Netanyahu sqaroi se ai foli me presidentin e Kryqit të Kuq dhe i kërkoi (organizatës) të punonte për të siguruar lirimin e menjëhershëm të tyre,” siç e kërkon ligji ndërkombëtar”. Ai gjithashtu kërkoi që Kryqi i Kuq të vizitojë të gjithë pengjet dhe të konfirmojë shëndetin e tyre të mirë, siç kërkohet përsëri nga ligji ndërkombëtar.
