Pasi dominuan për pothuajse gjithë sezonin renditjen e Bundesliga, “bavarezët” e Bayern Munich tashmë e shohin veten në vendin e 2-të të renditjes, 2 pikë më pak se “verdhezinjtë” e Borussia Dortmund, teksa ka mbetur vetëm 1 ndeshje në edicionin e këtij vitit të Kampionatit gjerman.
Mesditën e nesërme, “verdhezinjtë” do të presin në “Signal Iduna Park” rivalët e Mainz, ndërsa “baverezët” do të udhëtojnë drejt Këlnit aty ku do të përballen me vendasit. Ndërkaq, sot janë mbajtur dhe konferencat për shtyp në prag të përballjeve, nga ku tekniku i Bayern, Thomas Tuchel ka folur për luftën e vendit të parë të renditjes.
“Situata është shumë e qartë. Ne duhet të fitojmë ndeshjen tonë dhe më pas të shohim se si janë gjërat. Ne duhet të fitojmë dhe ne kemi nevojë për ndihmë. Çdo gjë mund të ndodhë karton i kuq, penallti, goditje standarte. Kjo mund të ndodhë si në ndeshjen tonë ashtu edhe në një tjetër.
Kemi bërë gabime mjaft shpesh dhe tani jemi në një situatë të tillë. Ne kemi fajin vetëm për këtë. Sido që të ndodhë, sezoni nuk do të quhet i kënaqshëm, por duhet ta luajmë deri në fund. Do të japim gjithçka për Bayernin.
Unë jam 100 për qind përgjegjës. Sapo nënshkrova kontratën dhe zhvilloj stërvitjen, jam përgjegjës dhe nuk i ik përgjegjësisë”,- u shpreh tepër i zhgënjyer për ecurinë e djemve të tij, tekniku Thomas Tuchel. /i.m /abcnews.al
