Projektligji për shëndetin seksual dhe riprodhues i hedhur për konsultim publik ka përfshirë në debat mjekë, përfaqësues të komuniteteve fetare dhe juristë. Surrogacia sipas avokates Enida Bozheku nga një mundësi për ti ardhur në ndihmë çifteve që në mënyrë natyrale nuk mund të bëhen prindër mund të kthehet në biznes madje mund të lërë shteg dhe për krimin e organizuar.
“Krijon tregun e nënave surrogato, Europa e Lindjes e ka problematikë se krimi i organizuar e sheh si mundësi për të shrytëzuar vajzat e reja, që për arsye ekonomike mund të kthehen në qenie laboratorike, të vënë në dispozicion trupin për të sjellë në jetë fëmijën e dikujt tjetër.
Do të kemi dhe turizëm të kësaj forme, do vijnë dhe të huaj, do gjejnë laboratorin shqiptar për të riprodhuar veten… “
Zgjidhje për të ndaluar fenomenin kriminal sipas juristes do të ishte ndërhyrja paralele në Kodin Penal.
“Duhet nen i posaçëm, në rastin kur janë të detyruara nga palë e tretë, krimi I organizuar, formulimi varet pastaj, dënohet më burg ose kur e përdorin për përfitim ekonomik për të tretë vepër penale…”
Nëse në këtë aspekt avokatja mendon se drafti duhet te jetë më detajist, nenin ku parashikohet që një e mitur mbi 16 vjeç mund të ndërpresë vullnetarisht shtatëzaninë edhe pa dijenin e prindit e sheh në kundërshtim me Kodin Civil.
“Është pjesa e zotësisë për të vepruar. Kështu që kemi një konflikt normativ sa i përket ligjeve siç është Kodi Civil ku mosha 18 vjeç e sipër që i jep mundësinë e vendimmarrjes dhe këtij ligji që thotë se një vajzë mbi 16 vjeç në mënyrë autonome të vendosë nëse e mban apo jo fëmijën edhe pa informuar familjen kur ajo bind operatorin shëndetësor që ka probleme në familje mund të braktiset. Shpesh kjo është e paprovueshme dhe është e vështirë ta lesh në dorë të mjekut.”
Në tërësi ligji sipas juristes I shërben shoqërisë, por sipas saj përpara miratimit ka nevojë për plotësime. Aktualisht ky draft është hedhur për konsultim publik dhe sipas Ministrisë së Shëndësisë përpara kalimit në Parlament do të reflektojë dhe përfunimet e dala nga ky proces./abcnews.al
