Festim Lelaj, ish-nënkomisar i policisë së Fierit, është një prej zyrtarëve të arrestuarve në kuadër të operacionit ndërkombëtar të anti-drogës të koduar “Shpirti”. Lelaj nuk është emër i panjohur për drejtësinë shqiptare pasi ai është arrestuar në 2017-ën për trafik narkotikësh në rastin e trafikut të 2.5 tonëve kanabis.
Sasia e madhe e drogës është kapur në janar 2017 brenda një kamioni në Ancona, kurse policia vendase mundi të kapë vetëm shoferin.
Lidhur me këtë rast policia italiane ka bashkëpunuar me Prokurorinë e Krimeve të Rënda dhe përgjatë një vit hetime, është konkretizuar me prova implikimi i nënkomisarit të policisë në këtë trafik droge.
Sipas prokurorisë, Lelaj ka qenë pjesë e një zinxhiri policor që janë implikuar me grupet e trafikut të drogës në Vlorë dhe se kishte njohje të afërt me Renaldo Avduli, polici i Vlorës i shpallur në kërkim për “Trafik të narkotikëve”.
Ka dyshime të forta, thotë prokuroria se nën-komisari Lelaj ka lidhje me grupet kriminale që kultivonin lëndën narkotike në zonën e Treblovës dhe Vezhdanishtit. Vetëm pak javë më parë Prokuroria e Posaçme kërkoi dënimin me 17 vite burg, por ai do të përfitojë ulje të dënimit për shkak të gjykimit të shkurtuar.
Procesi për ish-nënkomisarin, i cili ka qenë një nga efektivët e implikuar në atë që u quajt kanabizim i vendit në vitet 2016-2017, u zvarrit për të paktën dy vite në Gjykatë.
Edhe SPAK ka hasur vështirësi ne ecurinë e procesit, kjo për shkak të ndryshimit të gjyqtarëve. Lelaj akuzohet për ‘Trafikimi i narkotikëve’, në formën e posaçme të grupit të strukturuar kriminal, ‘Grup i strukturuar kriminal’ “Kryerja e veprave penale nga organizata kriminale. /abcnews.al/
