Gjyqtarja Matilda Fetahu ka rrëzuar kërkesën e Prokurorisë se rrethit Elbasan për masën “Arrest me burg” për të 5 të arrestuarit e Cërrikut, ish-drejtori i zjarrfikëses dhe 4 vartësit duke i dhënë masën ‘Arrest shtëpie’. Gjyqi është zhvilluar me dyer të mbyllura.
36-vjeçari Artion Taci ishte vënë nën vëzhgim që ne muajin prill.
Para dhe pas zgjedhjeve rezulton se ai ka biseduar me mbi 40 persona të cilët mendohet se i ka ndihmuar të shmangin detyrimet ligjore që ata kishin në lidhje me masat e sigurisë për mbrojtjen nga zjarri ne bizneset e tyre.
Indicia për të nisur hetimet ka ardhur pas denoncimit të një qytetari.
Drejtori i shërbimit zjarrfikës në Cërrik Artion Taci u arrestua të enjten nga Agjencia e Mbikqyrjes Policore në Elbasan.
Në pranga kanë përfunduar dhe dy vartësit e tij Armand Gjoka dhe Adnand Xhelili, përgjegjësi i OSHEE Cërrik Alban Shima dhe punonjësi i bashkisë së Cërrikut Agiano Dinoshi me detyre specialist në zyrën e taksave.
Mbi kreun e zjarrfikëses rëndojnë veprat penale të “Ushtrimit te ndikimit të paligjshëm ndaj personave që ushtrojnë funksione publike”, dhe “Përdorimi i funksionit publik për veprimtari politike ose zgjedhore. Dy vartësit e tij akuzohen për “Përdorim të funksionit publik për veprimtari politike ose zgjedhore”. Ndërsa punonjësi i bashkisë është arrestuar për lëshim të vërtetimeve false për disa biznese gjatë periudhës së fushatës zgjedhore të 14 majit./abcnews.al
