Kozmonauti Frank Borman, komandanti i misionit legjendar Apollo 8, i pari që fluturoi rreth Hënës, ka vdekur në moshën 95-vjeçare, njoftoi NASA.
“Frank Bormann ishte një hero i vërtetë amerikan”, tha kreu i agjencisë amerikane të hapësirës, Bill Nelson.
“Përvoja dhe ekspertiza e tij e gjerë bëri që NASA ta zgjidhte atë për t’iu bashkuar grupit të saj të dytë të astronautëve,” shtoi Nelson.
Në vitin 1965, ai shkoi në hapësirë për herë të parë në misionin Gemini 7, i cili zgjati 14 ditë.
Misioni Apollo 8 u ngrit në dhjetor 1968, me Frank Borman dhe dy astronautë të tjerë, James Lovell dhe William Anders.
Gjatë misionit Apollo 8, ata udhëtuan 378,000 kilometra dhe rrethuan hënën 10 herë, gjë që më vonë ndihmoi në uljen e parë me njerëz në Hënë, gjatë misionit Apollo 11, kur Neil Armstrong u bë njeriu i parë që u ul në tokën hënore. më 20 korrik 1969.
Fotoja e famshme “Earthrise” është realizuar gjatë këtij misioni.
“Shërbimi i tij për NASA-n dhe kombin tonë do të frymëzojë pa mëdyshje brezin e Artemis për të arritur brigje të reja kozmike,” tha Bill Nelson.
NASA planifikon të kthehet në Hënë me programin Artemis, pasardhësin e Apollonit. Misioni Artemis 2 është planifikuar të ngrihet në fund të vitit 2024 dhe të rrotullohet rreth Hënës me një ekuipazh në bord.
Këtë herë, NASA dëshiron të krijojë një prani të përhershme njerëzore në Hënë, në mënyrë që ajo të jetë një trampolinë për misionet e drejtuara në Mars./abcnews.al
