NATO, Rubio: Ndoshta tërhiqemi/ Trump: E kemi ndihmuar gjithmonë, por nuk na ndihmoi në Iran

Donald Trump po e shqyrton seriozisht tërheqjen e Shteteve të Bashkuara nga NATO. Në një intervistë për The Telegraph, kreu i Shtëpisë së Bardhë e cilësoi aleancën një tigër prej letre, ndërsa arsyetoi se opsioni i largimit nga aleanca po shqyrtohet pasi vendet anëtare nuk mbështetën luftën e Shteteve të Bashkuara ndaj Iranit.
Ky është sinjali më i fortë deri më tani se Shtëpia e Bardhë nuk e konsideron më Evropën si një partner të besueshëm mbrojtës, pasi aleatët refuzuan kërkesën e Trump për të dërguar anije luftarake për të rihapur Ngushticën e Hormuzit.
Duke veçuar Mbretërinë e Bashkuar, presidenti amerikan e kritikoi Keir Starmer për refuzimin e përfshirjes në luftën amerikano-izraelite kundër Iranit, duke sugjeruar se Marina Mbretërore nuk ishte e gatshme për detyrën.
Pas këtyre deklaratave, Keir Starmer, Kryeministri i Britanisë së Madhe, iu përgjigj Donald Trump duke thënë se ai do të zgjedhë të bëjë gjithmonë atë që për britanikët është në interesin e tyre kombëtar. Starmer zbuloi se Mbretëria e Bashkuar do të mbajë një takim me 35 vende të ndryshme, ku nuk përfshihen Shtetet e Bashkuara, për të diskutuar mundësitë e rihapjes së Kanalit të Hormuzit. Ndërkohë, Trump në intervistën e tij për The Telegraph tha se Shtetet e Bashkuara mbrojtën NATO-n për Ukrainën, edhe pse nuk ishte një problem i Uashingtonit. Kjo ishte prova që Shtetet e Bashkuara do të ishin gjithmonë aty për NATO-n, por e anasjellta nuk ndodhi.
Marco Rubio, sekretari i shtetit, më herët tha për Fox News se Amerika do të duhet të rishqyrtojë anëtarësimin e saj në NATO kur lufta në Iran të mbarojë.
Në intervistën e tij për The Telegraph, presidenti Trump u shpreh i kënaqur me komentet e Rubio.