Nafta në 150 dollarë për fuçi mund të çojë botën në recesion

Nëse çmimi i naftës arrin në 150 dollarë për fuçi, kjo do të shkaktojë një recesion global, i ka thënë BBC-së drejtuesi i gjigantit financiar amerikan BlackRock.

Larry Fink, i cili drejton menaxherin më të madh të aseteve në botë, tha se nëse Irani “mbetet një kërcënim” dhe çmimet e naftës qëndrojnë të larta, kjo do të ketë “implikime të thella” për ekonominë globale.

Në një intervistë ekskluzive dhe të gjerë, ai gjithashtu mohoi se ekziston një “flluskë” e inteligjencës artificiale, megjithëse tha se teknologjia e re po bën që shumë njerëz të ndjekin studime universitare dhe jo mjaftueshëm trajnime teknike.

BlackRock është një kolos financiar që menaxhon asete me vlerë 14 trilionë dollarë (10.5 trilionë paund) dhe është një nga investitorët më të mëdhenj në shumë prej kompanive më të mëdha në botë. Madhësia dhe shtrirja e tij i japin Fink-ut një nga tetë bashkëthemeluesit e kompanisë, e krijuar në vitin 1988  një perspektivë unike mbi gjendjen e ekonomisë globale.

Konflikti në Lindjen e Mesme ka shkaktuar luhatje të forta në tregjet financiare, ndërsa njerëzit përpiqen të vlerësojnë se çfarë do të ndodhë me kostot e energjisë.

Sipas Fink, është ende herët për të përcaktuar shkallën dhe rezultatin përfundimtar të konfliktit, por ai beson se do të përfundojë në një nga dy skenarët ekstremë.

Në njërin rast, nëse konflikti zgjidhet dhe Irani bëhet një vend që mund të pranohet sërish nga komuniteti ndërkombëtar, atëherë çmimi i naftës mund të bjerë nën nivelet që kishte para luftës.

Por nëse jo, ai thotë se mund të ketë “vite me naftë mbi 100 dollarë, afër 150 dollarëve”, gjë që ka implikime të thella për ekonominë dhe mund të çojë në “një recesion të fortë dhe të thellë”.

Rritja e kostove të energjisë ka bërë që disa në Mbretërinë e Bashkuar të argumentojnë se vendi duhet të fokusohet më shumë në prodhimin e vet të naftës dhe gazit.

Të martën, organizata e industrisë Offshore Energies UK tha se pa më shumë prodhim vendas, vendi rrezikon të bëhet i varur nga importet “në një kohë të rritjes së paqëndrueshmërisë globale”.

Fink thotë se vendet duhet të jenë pragmatike për përzierjen e tyre energjetike, duke përdorur të gjitha burimet e disponueshme, por sigurimi i energjisë së lirë është thelbësor për nxitjen e rritjes ekonomike dhe përmirësimin e standardeve të jetesës.