Vedat Muriqi së fundmi është rikuperuar nga dëmtimi dhe do të jetë në dispozicion për trajnerin Inzaghi në ndeshjen e nesërme ndaj Napolit. Tani dardani ka mundësinë e artë për të bërë mirë dhe fituar besimin e të gjithëve te Lazio.
Nga Italia, Corriere dello Sport raporton se besimi te Muriqi nuk është venitur, por po pritet që ai të tregojë aftësitë e tij. Dy dëmtime dhe infektimi me Covid-19 e kanë frenuar shumë sulmuesin, që ende nuk ka gjetur golin e parë në Itali.
Por mundësitë e Muriqit për të treguar veten nuk kanë përfunduar. Madje e ardhmja e konkurrentit të tij në sulm varet nga dardani. Nëse Muriqi do të shfaqë shkëndija të mira gjatë ndeshjeve të mbetura të këtij viti, Caicedo do të largohet te Fiorentina.
Ekonomia është e rëndësishme te Lazio dhe një ofertë prej 5 milionësh do e bindte Lotiton të hiqte dorë nga ekuadoriani. Gjithsesi për momentin gjithçka varet nga Muriqi, që duhet të tregojë vlerat e tij të padiskutueshme. /abcnews.al
