Ambasadorja e Francës në Shqipëri Elisabeth Barsacq dhe ai i Gjermanisë Peter Zingraf kanë reaguar pas përhapjes në media të lajmit se ata u larguan nga konferenca e kryeministrit Edi Rama për Amnistisë Fiskale. Në reagimin e tyre, dy ambasadorët shpjegojnë se atyre u desh të largoheshin pasi kishin takime. Po ashtu, ata shtojnë se ndajnë plotësisht qëndrimin e mbajtur nga delegacioni i BE-së në Shqipëri.
“Ne u larguam këtë mëngjes nga konferenca për amnistinë fiskale pasi të dy kishim takime. Ndajmë plotësisht qëndrimin e shprehur nga delegacioni i Bashkimit Evropian,” thuhet në reagim.
Por cili është qëndrimi i mbajtur nga delegacioni i BE-së në Shqipëri sa i përket draftit për amnistinë fiskale.
Përmes një deklarate të shpërndarë të hënën nga delegacioni i BE-së në Tiranë, Komisioni Europian deklaroi se drafti dobëson kontrollin e Shqipërisë ndaj pastrimit të parave, “gjë që shqetëson shtetet anëtare të Bashkimit Europian si dhe partnerët e tjerë.”
Përfaqësuesit e Komisionit Europian e kanë shprehur qëndrimin para zyrtarëve të qeverisë shqiptare gjatë takimit të 13-të të Nënkomitetit për Tregtinë, Industrinë, Doganat dhe Tatimet ndërmjet BE-së dhe Shqipërisë mbajtur më 29 qershor në Bruksel.
“Komisioni nënvizoi shqetësime serioze për draftin aktual të ligjit për amnisti fiskale. Ai do të dobësonte kontrollet e Shqipërisë kundër pastrimit të parave, ndërkohë që do të bënte pak për të rritur aftësinë e administratës tatimore për të përmirësuar pajtueshmërinë e ardhshme lidhur me kërkesat tatimore. Për shkak se rezidentët jotatimorë, përfshirë shqiptarët që jetojnë në BE ose në Ballkanin Perëndimor, përfshihen në objektin e tij dhe u kërkohet të importojnë para në dorë për të përfituar nga amnistia, drafti aktual i ligjit ngre shqetësime serioze për shtetet anëtare të BE-së dhe partnerët e tjerë, si dhe një rrezik thelbësor reputacioni për vendin,” thuhet në njoftim.
“Qeveria shqiptare publikoi para pak pak ditësh për konsultim publik një draft të ri të projektligjit kontrovers të amnistisë fiskale, pasi u detyrua të tërheqë një projekt të ngjashëm nga shtyrtimi parlamentar vitin e kaluar nën presionin e Komisionit Evropian.
Projekti parashikon që përkundrejt një tatimi nga 5 deri në 10% të pasurisë së vënë përmes kontrabandës apo evazionit fiskal, shtetasit shqiptarë apo të huajt me rezidencë fiskale në Shqipëri do të kenë mundësinë të deklarojnë deri në 2 milionë euro për familje dhe t’i shpëtojnë përgjithmonë përgjegjësisë penale apo administrative për krimet e kryera, përfshirë evazionin fiskal, mashtrimin me TVSH-në apo kontrabandën me mallrat e akcizës.
Qeveria e kryeministrit Edi Rama publikoi në vitin 2020 një nismë për amnisti fiskale ndërsa u përball me kritika nga Fondi Monetar Ndërkombëtar, i cili theksoi se një amnisti fiskale mund të përdoret për pastrim parash.
Gjatë takimit të përbashkët BE-Shqipëri, që u bashkëdrejtuara nga Andreë Williams, sekretar i Përhershëm i Nënkomitetit në Drejtorinë e Përgjithshme për Fqinjësinë dhe Negociatat e Zgjerimit të KE dhe Vasilika Vjero, Zv/ministre e Financave dhe Ekonomisë, u diskutuan dhe marrëdhëniet tregtare të Shqipërisë me Emiratet e Bashkuara Arabe, për të cilat KE kërkon qartësi dhe të barazi në konkurim për kompanitë europiane.
“Komisioni theksoi nevojën për qartësi të marrëveshjes tregtare në lidhje me mënyrën se si kompanitë e BE-së mund të konkurrojnë mbi baza të drejta dhe të barabarta për kontrata publike, siç parashikohet në Marrëveshjen e Stabilizim-Asociimit,” thuhet më tej në qëndrimin e mbajtur nga KE.
Më herët gjatë ditës së sotme për mos-prezencën e dy ambasadorëve reagoi edhe Partia Demokratike. Në një deklaratë për shtyp, sekretari për çështje ligjore, Ivi Kaso tha se PD dënon sjelljen, sipas tij, arrogante të Ramës me dhomat Amerikane dhe Gjermane të Tregtisë, sipas tij të vetmet institucione, përveç opozitës, të pakapura nga qeveria.
Sa i përket mungesës së ambasadorëve, Kaso tha me ironi që PD uron që të mos i “dënojë me riedukim.” /abcnews.al/
