Një ngjarje e rëndë ka ndodhur në New Mexico të Shteteve të Bashkuara ku një nënë e re ka hedhur në plehra foshnjën e saj të porsalindur.
Mediat e huaja kanë publikuar pamjet e momentit kur ajo e hedh në plehra foshnjën, e cila më pas është gjetur nga mbledhësit e plehrave.
Sipas asaj që raportojnë mediat gjyshi i foshnjës që u braktis nga nëna e saj thotë se i biri i tij 16-vjeçar është babai i foshnjës dhe se familja e tij dëshiron që ta mbajë atë. 50 vjeçari Oscar Astorga, në një prononcim për mediat ka thënë se i biri i tij Stephen, nuk e dinte se ish e dashura, Alexis Avila, 18 vjeçe, ishte shtatzënë derisa lindi javën e kaluar dhe më pas u kap në kamerë duke e hedhur fëmijën në një kontejner mbeturinash prapa një qendre tregtare.
Në intervistën e tij ai ka pohuar se familja dëshiron që ta marrë foshnjën.
“Natyrisht që po përpiqemi që ta marrim. Ai është nipi im. Prandaj nuk mund të komentoj për asgjë, sepse po mundohemi që ta marrim nipin tim”, është shprehur ai.
Në bazë të mesazheve mes të riut dhe një miku, babai i foshnjës besonte se ish e dashura ka pasur abort dhe nuk ishte në dijeni se do të bëhej prind derisa ajo u arrestua për hedhjen e foshnjës në mbeturina.
Nëna e arrestuar i ka thënë policisë se nuk e dinte që është shtatzënë dhe e mori vesh këtë vetëm kur filloi të kishte dhimbje në bark. Ajo është akuzuar për tentim-vrasje dhe abuzim të fëmijës dhe pritet të paraqitet në një gjykatë në Lovington./abcnews.al
