Loading ...
Ish-kryeministri i Maqedonisë së Veriut Nikolla Gruevski dhe ish-deputeti Pavle Bogoevski janë zhveshur nga çdo post zyrtar në momentin që parlamenti i vendit vendosi për heqjen e mandatit të deputetit ndaj tyre. Parlamenti ia konstatoi dorëheqjen ish-kryeministrit dhe deputetit Nikolla Gruevski. Paralelisht me Gruevskin, pa post deputeti mbeti edhe Pavle Bogoevski, i cili pati paralajmëruar dorëheqjen pas skandalit me porosinë e marijuanës.
Lamtumirë Pavle. Kuvendi i Maqedonisë sw Veriut u përshëndet nga dy deputetë.
Edhe pse Lidhja Social Demokrate në fillim nuk pranonte që dorëheqja vetëm të konstatohet, për shkak se Gruevski nuk e ka dorëzuar personalisht, ashtu siç kërkon rregullorja e Kuvendit, në fund u pajtuan që mos të votohet për t’u marrë mandati. Kjo hap mundësinë që Gruevski të kërkoj apanazhë, por deri më tani, kërkesë në Kuvend nuk ka ardhur. E Bogoevski ende nuk ka vendosur, por nuk e hedh poshtë si mundësi.
“Nikolla Gruevski ende e udhëheq VMRO DPMNE-në, kurse Mickoski dhe kryesia janë vetëm persona të dëgjueshëm të partisë, që me besim të plotë punojnë për liderin e tyre të arratisur”, tha ai.
E koordinatori i grupit parlamentar të VMRO DPMNE-së, Nikolla Micevski, kujtoi se vendimi i komitetit ekzekutiv të partisë ka qenë që të respektohet ligji dhe Kushtetuta.
“Komiteti ekzekutiv në kumtesën e lëshuar për opinionin ishte i qartë”, tha ai.
Por Micevski harroi të cekë faktin se deputetet e VMRO DPMNE-së nuk e dëgjuan partinë dhe nuk votuan rekomandimin për marrjen e mandatit të Gruevskit në komision, fakt të cilin e rikujtoi edhe koordinatori i grupit parlamentar të LSDM-së, Jovan Mitrevski. Vendin e Gruevskit në Kuvend do ta zë, Gjoko Kamçev, politikolog i diplomuar nga Vallandova, kurse vendin e Bogoevskit, Aleksandër Filipovski./ABC News Albania 24/7
