Ministri izraelit i Mbrojtjes, Israel Katz njoftoi sot se ushtria izraelite do të shkatërrojë të gjitha tunelet e Hamasit në territorin palestinez, pas lirimit të pengjeve të mbajtura në Rripin e Gazës.
Në ditën e tretë të armëpushimit midis Izraelit dhe Hamasit, Katz theksoi në një deklaratë se këto operacione do të kryhen brenda kuadrit të “mekanizmit ndërkombëtar (…) nën mbikëqyrjen e Shteteve të Bashkuara”.
“Sfida e madhe e Izraelit pas fazës së kthimit të pengjeve do të jetë shkatërrimi i të gjitha tuneleve terroriste të Hamasit në Gaza”, tha ai.
“Kam urdhëruar ushtrinë të përgatitet për këtë mision”, shtoi ai.
Hamasi ka një rrjet tunelesh nën Rripin e Gazës, të përdorur në veçanti nga krahu i tij i armatosur.
Izraeli ka pretenduar se ka shkatërruar shumë prej tyre në më shumë se dy vjet luftë, të shkaktuar nga sulmi i paprecedentë i lëvizjes islamike ndaj Izraelit më 7 tetor 2023.
Sipas një marrëveshjeje armëpushimi me Izraelin të njoftuar të enjten, Hamasi duhet të dorëzojë 48 pengjet e mbetura në Gaza, të gjallë ose të vdekur, të gjithë përveç njërit prej të cilëve u rrëmbyen gjatë atij sulmi.
