Milani kualifikohet për në gjysmëfinalen e Kupës së Italisë pas suksesit ndaj Interit. Ndeshja në “San Siro” u vendos në kohën shtesë dhe skuadra milaniste ka ende shpresë për trofe këtë sezon
Derbin e fitoi ai ekip që e kishte më të rëndësishëm.
Pra, Milani.
Skuadra në krizë e trajnerit Gatuzo mundi Interin 1-0 dhe u kualifikua në gjysmëfinalen e Kupës së Italisë, një nga objektivat e paktë që I mbeten këtë sezon.
Dështimet në kampionat e bënin të domosdoshëm këtë sukses që u arrit falë një goli të shënuar nga Kutrone në kohën e parë shtesë.
Lojtari 19-vjeçar, I marrë nga ekipi I të rinjve, u bë shpëtimtari I Milanit me emër të madh, por që mbetet në krizë të plotë në Serinë A.
Mjaft pozitive për Milanin paraqitja e portierit të dytë, Antonio Donaruma, vëllai I portierit titullar, Xhixho Donaruma.
Ishte një derbi I fortë, por jo I bukur, me të dyja skuadrat nën presion të madh, pas humbjeve të fundit të pësuara në kampionat.
Interi, I cilësuar më shumë favorit përpara fillimit, zhgënjeu duke pësuar disfatën e tretë rresht.
Ndoshta futbollistët e trajnerit Spaleti ishin më të qetë duke qenë vetëm 5 pikë larg kreut të Serisë A, por gjithsesi eleminimi nga Kupa ishte një dështim I madh.
Për më tepër, Interi hodhi në fushë lojtarët më të mirë, me përjashtim të atyre që ishin të dëmtuar, por përsëri nuk ia doli.
Ndeshja e ardhshme në kampionat ndaj Lacios duhet fituar me patjetër, ndryshe kriza do të jetë e plotë.
Milani, ndërkaq, mund të pretendojë fitoren e Kupës, ashtu si edhe atë të Ligës së Europës, por sërish tifozët nuk janë të kënaqur./abcnews.al
