Lul Berisha, Plarent Dervishaj, Indrit Taullau dhe Luftar Reci akuzohen për vrasjen e Klodian Saliut në vitin 2005 dhe biznesmenit Vajdin Lamaj. Por si u vra Klodian Saliu dhe cili ishte historiku i lidhjes së tij me bandën e Durrësit. Klodian Saliu, anëtar i bandës famëkeqe të Durrësit, u vra me 26 shkurt të vitit 2005.
Lexo edhe: SPAK: Shullazi vrau Vajdin Lamen 15 vite më parë, Lul Berisha në kërkim për ekzekutimin e rivalit
Në datë 26.02.2005 rreth orës 22:00, në vendin e quajtur autostrada Tiranë – Durrës në drejtim të Tiranës, në segmentin rrugor Durrës – Maminas, në afërsi të fshatit Koxhaj, Saliu u qëllua me armë zjarri, teksa ishte duke udhëtuar me makinën tij tip “Mercedes Benz”, ngjyrë gri me targë DR8907C.
Nga këto goditje me armë zjarri Saliu mbeti i vdekur në vend ndërsa u plagos O. Truma, i cili ndodhej në automjet nën shoqërinë e viktimës. 24 orë më pas u ekzekutua Vajdin Lamaj dhe për këtë akuzohet Emiljano Shullazi me Viktor Ymerin me bashkëpunimin e bandës së Durrësit, që akuzohet për vrasjen e Saliut.
Përplasjet brenda bandës së Durrësit
Vepra e parë kriminale e bandës ishte vrasja e Dritan Sallakut më 17 tetor të vitit 1998 në qytetin e Durrësit. Në krye të saj akuzohet se qëndronte Lul Berisha dhe Klodian Saliu.
Në vitin 2003, si pasojë e kontradiktave të brendshme, organizata u nda në dy të tjera, të kryesuara respektivisht nga Lulzim Berisha dhe Klodian Saliu. Të dyja këto organizata u kthyen në rivale të njëra- tjetrës duke filluar një luftë ndërmjet tyre.
Pas përplasjeve të brendshme, SPAK akuzon Lul Berishën dhe pjesën tjetër të anëtarëve të bandës se organizuan atentatin për vrasjen e Klodian Saliut më datë 26 shkurt të vitit 2005, pranë fshatit Maminas të rrethit të Durrësit./ db/Abcnews.al
