Një ditë pasi Komisioni Evropian rekomandoi hapjen e negociatave për Shqipërinë, Komisioneri për Zgjerim, Oliver Varheli ka marrë një letër 3 faqëshe nga Presidenti shqiptar, Ilir Meta.
Mazhoranca ishte e para që foli për ekzistencën e kësaj shkrese.
“Me lloj-lloj letrash drejtuar presidenteve apo anëtare evropianë. Me vjen keq se si përfundoi PD të jetë shtojcë e Ilir Metës”, tha Balla.
Në këtë letër, Meta rreshton një sërë akuzash ndaj mazhorancës, kryesisht lidhur me emërimet e gjyqtarëve kushtetues.
“Padiskutim ka një mosmarrëveshje, në lidhje me procedurën e emërimit të gjyqtarëve kushtetues, por kjo vjen nga interpretimi i ndryshëm prej shumicës qeverisëse e cila tenton të kapë Gjykatën Kushtetuese të vendit duke e thelluar krizën mes palëve në Shqipëri.
Oreksi politik i mazhorancës socialiste kërkon të prishë këtë balancë, në mënyrë që të vendosë nën kontroll politik Gjykatën”.
Presidenti ka ankesa dhe për misionin e BE-së në Shqipëri, Euralius, i cili punon me të gjitha palët në fushën e legjislacionit.
“Dua t’u theksoj se i vetmi aktor që në mënyrë të pashpjegueshme që nuk më është përgjigjur është misioni EURALIUS 5, një trupë e thirrur për të ndihmuar autoritetet në këtë çështje lidhur me reformat e BE”.
Ilir Meta këron ndihmë nga Brukseli që situata të mos rëndohet dhe garanton se ai vetë nuk do të lëkundet në betejën e tij.
“Besoj se Komisioni Europian duhet të vihet me gjithë zemër në krah të interesave të popullit shqiptarë. Çdo lloj mbështetje në gërryerjen e mëtejshme të demokracisë dhe shtetit ligjor në vendin tim, do të përshkallëzojë krizën aktuale dhe inkurajojë ç’popullimin e Shqipërisë.
Unë do të qëndroj i palëkundur në mbrojtje të integritetit të themelimit të Gjykatës Kushtetuese si e vetmja shpresë për një qeverisje me llogaridhënie përmes parimit Check and Balance, në mënyrë të posaçme përballë kësaj situate politike dramatike në Shqipëri.”
Pasi letra u publikua në media, Presidenti e postoi atë në FB, me argumentin për të shmangur çdo keqkuptim./abcnews.al
