Presidenti i Republikës Ilir Meta këtë të mërkurë ka kujtuar ditën e liberalizimit të vizave me BE-në.
Kreu i shtetit përmes një postimi në rrjetin social Facebook, shkruan se në më pak se dy vite, ne përmbushëm 42 kushte dhe më shumë se 100 kërkesa bashkëshoqëruese, që lidheshin me shtetin ligjor, sigurinë dhe të drejtat themelore.
Meta ndër të tjera thekson se rruga europiane e shqiptarëve është e pangatërrueshme me qorrsokake të tjera, qofshin këto ballkanike dhe se është koha për të mbrojtur këtë arritje të madhe.
“????? Më 15 dhjetor 2010, qytetarët shqiptarë udhëtuan për herë të parë pa viza drejt Europës.
Në më pak se dy vite, ne përmbushëm 42 kushte dhe më shumë se 100 kërkesa bashkëshoqëruese, që lidheshin me shtetin ligjor, sigurinë dhe të drejtat themelore.
Lëvizja pa viza drejt BE ka qenë ngjarja me ndikimin më të madh dhe të drejtpërdrejtë tek qytetarët shqiptarë, në të gjithë procesin e anëtarësimit.
E drejta për të udhëtuar pa viza drejt BE iu ktheu qytetarëve dhe shtetit shqiptar dinjitetin e njerëzve të lirë, të paparagjykuar, duke iu hapur horizonte dhe mundësi të reja për ndërtimin e të ardhmes së tyre europiane.
Ndaj është koha të bëjmë gjithçka për të mbrojtur këtë arritje të madhe.
Rruga europiane e shqiptarëve është shtruar përmes vetëdijes kombëtare se objektivi strategjik i anëtarësimit në BE është i pakompromentueshëm, i patjetërsueshëm dhe i pangatërrueshëm me qorrsokake të tjera, qofshin këto ballkanike”, shkruan Meta. /abcnews.al
