TIRANË- Ilir Meta i ka parë nga jashtë sallës parlamentare, përpjekjet për të bërë 84 votë, që nuk u bënë dot, për të miratuar Amnistinë Penale. Por panoramën e asaj që ndodhi duket se e ka të qartë dhe nuk kursen radhët e opozitarëve.
“Tërheqja nga rendi i ditës gjithashtu në seancën e fundit plenare të projektligjit për Amnistinë Penale ishte një tjetër dëshmi tronditëse se si institucioni i Kuvendit është marrë peng nga Edi Rama, ku ligjet futen dhe hiqen në rendin e ditës, sipas agjendave politike të Kryeministrit dhe pazareve të ulëta politike që bëhen apo zhbëhen”.
Partia e Lirisë nuk bëri asnjë propozim për Amnistinë, duke qëndruar në distancë edhe mundësive për të gjetur vota në radhët e 3 deputetëve të saj në parlament.
Ndryshe vepruan opozitarët demokratë. Partia Demokratike e Lulzim Bashës kërkoi të përfshihej në proces, përmes një amendamenti që kërkonte lirimin e mbi 300 protestuesve të saj.
Larg nuk qëndruan as opozitarët në aksion, që nga një anë bllokojnë seancë dhe nga ana tjetër propozuan amendime në Amnisti. Ishte Ferdinand Xhaferraj i pari bëri propozim dhe pas tij dhe deputeti i grupit Bardhi, Bledion Ballbati, që shkaktoi debat/abcnews.al
