Kancelarja gjermane Angela Merkel ka paralajmëruar se rreziku i pandemisë ende nuk ka kaluar dhe se duhen respektuar me rreptësi rregullat e përcaktuara të emergjencës shëndetësore.
Merkel tha se “efektet e dhunshme” të pandemisë, në aspektin shëndetësor dhe ekonomik janë dramatike. Koronavirusi u ka marrë jetën më shumë se 100 mijë njerëzve në Europë.
Merkel theksoi se “Rreziku është ende serioz dhe ne priremi ta harrojmë atë. Kjo shihet në shpërthimet e reja rajonale në Gjermani. Të gjithë kanë fatin e të gjithëve në duart e tyre, dhe çdo njëri është i detyruar të respektojë rregullat”.
Vetëm politikanët nuk do të jenë në gjendje t’i japin fund përhapjes së virusit, tha Merkel, duke shtuar se kërkon që të gjithë duhet të veprojnë me përgjegjësi.
“Ne duhet ta shohim të gjithë si detyrimin tonë të përbashkët, dhe të kuptojmë se duke ndjekur rregullat për distancimin social, duke përdorur maskat dhe duke praktikuar higjienën e duarve, secili prej nesh kontribuon në fatin tonë të përbashkët,” përfundoi ajo./abcnews.al
