Zonja e parë e SHBA-ve Melania Trump teksa tregonte historinë e saj personale pas infektimit me Covid-19 nga Shtëpia e Bardhë, njoftoi se djali i saj, Barron, 14 vjeç, kishte rezultuar pozitiv.
Melania theksoi se Barron tashmë është negativizuar ashtu si dhe bashkëshorti i saj Presidenti Donald Trump.
“Natyrisht, mendja ime u fokusua menjëherë tek djali ynë,” tha ajo.
Barron Trump fillimisht u testua negativ pas infektimit të Melanias dhe Presidentit Trump.
Trump njoftoi se djali i saj nuk kishte “asnjë simptomë” dhe tani është testuar dhe ka rezultuar negativ.
Sa i përket simptomave të saj, zonja e parë tha se ato ishin “minimale, megjithëse çdo ditë që kalonte kishte simptoma të reja”.
Ajo tha se kishte dhimbje trupi, kollë, dhimbje koke dhe ishte jashtëzakonisht e lodhur.
Ndryshe nga burri i saj, Melania Trump nuk shkoi në spital për trajtim dhe qëndroi e izoluar në rezidencën e Shtëpisë së Bardhë.
Trump deklaroi se ajo nuk zgjodhi të njëjtin kurs trajtimi si Presidenti.
Ajo tha se “zgjodhi një rrugë më natyrale”, duke u mbështetur në “vitamina dhe ushqim të shëndetshëm”, dhe jo një koktej ilaçesh.
n.d./abcnews.al
