Nënkryetari i Këshillit të Sigurimit të Rusisë, Dmitry Medvedev, paralajmëroi se Rusia duhet të jetë e gatshme për “betejat e ardhshme për mbrojtjen e atdheut“.
Sipas Medvedev, edhe nëse autoritetet në Kiev kapitullojnë dhe një “regjim politik i moderuar zëvendësohet, nuk do të jetë fundi i operacionit ushtarak rus“.
“Edhe pas nënshkrimit të dokumenteve dhe pranimit të humbjes, pjesa e mbetur e radikalëve herët a vonë do të kthehet në pushtet pas rigrupimit të forcave, të inkurajuara nga armiqtë perëndimorë të Rusisë. Dhe atëherë do të vijë koha për të shtypur të keqen. Le të shkatërrojmë mbetjet e trashëgimisë së saj të përgjakshme dhe t’i kthejmë territoret e mbetura në djepin e tokës ruse“, shkroi Medvedev në Telegram.
Në të njëjtën kohë, ai është i sigurt se “armiqtë e Rusisë nuk do të zhduken as pas kësaj”, transmeton Sputnik. “Ata do të mbledhin forcë dhe do të presin një arsye të re të përshtatshme për të shkatërruar vendin tonë. Duhet të jemi gati për betejat e ardhshme për mbrojtjen e atdheut”, përfundoi Medvedev./abcnews.al
