Të tjera ndryshime në qeverinë e Albin Kurtit. Kryeministri ka konfirmuar se ka pranuar dorëheqjen e ministrit të Mbrojtjes, Armend Mehaj, e cila sipas tij vjen për shkaqe familjare.
Po ashtu kryeministri ka konfirmuar se ministri i ri i Mbrojtjes do të jetë Ejup Maqedonci.
“Sot, me kërkesë të ministrit të mbrojtjes, Armend Mehaj, kam pranuar dorëheqjen e tij. Kërkesa për lirim nga detyra vjen për shkaqe familjare. Ministrin Mehaj e falënderova për punën e pandërprerë, kontributin mbresëlënës, bashkëpunimin e rregullt dhe angazhimin e tij shembullor nga dita e parë e marrjes së detyrës.
Ministër të ri të mbrojtjes emërova Ejup Maqedoncin, me të cilin kemi bashkëpunuar deri më tani në funksione tjera. Ministrit Maqedonci i uroj punë të mbarë në avancimin e mbrojtjes dhe sigurisë, në zhvillimin dhe ndërtimin e ushtrisë sonë” thotë Kurti.
Kolonel Maqedonci ka përfunduar dy Kolegje ushtarake dhe dy programe master në Shtetet e Bashkuara të Amerikës.
Para se të bëhej pjesë e FSK-së, Ejup Maqedonci kur ishte 19 vjec iu bashkua Ushtrisë Çlirimtare të Kosovës. Gjatë asaj kohe, ka shërbyer si Komandant i Batalionit të Parë të Brigadës 153 të Zonës Operative të Llapit në UÇK. /abcnews.al
