Rreth 600 profile të rreme lëshuan më shumë se 2000 komente në javë në mbështetje të veprimeve ushtarake të Izraelit.
Të paktën 128 anëtarë të Kongresit janë vënë në shënjestër të një operacioni të lidhur me Izraelin për të përhapur përmbajtje ushtarake pro-izraelite në mes të luftës së vazhdueshme në Rripin e Gazës, sipas të dhënave të ndara me Politico nga një grup izraelit vëzhgues i dezinformimit.
New York Times raportoi të mërkurën, se operacioni u mbështet nga qeveria izraelite dhe kishte në shënjestër disa politikanë amerikanë, pa përmendur megjithatë një numër specifik.
Organizimi i një fushate ndikimi që synon ligjvënësit amerikanë u bë publike për herë të parë marsin e kaluar. Në të, rreth 600 profile të rreme lëshuan më shumë se 2000 komente të koordinuara në javë në mbështetje të veprimeve ushtarake të Izraelit, duke kritikuar grupet palestineze të të drejtave dhe duke hedhur poshtë akuzat për shkelje të të drejtave të njeriut.
Postimet synonin llogaritë e mediave sociale të të paktën 128 ligjvënësve amerikanë, sipas FakeReporter, një organizatë izraelite kundër dezinformimit që raportoi për herë të parë ekzistencën e rrjetit.
Komentuesit në rrjetin e dezinformimit u paraqitën si përdorues amerikanë të mediave sociale dhe rregullisht përforconin mesazhet pro-izraelite duke shpërndarë lidhje me mediat e lajmeve të rreme.
Sipas New York Times, Ministria e Çështjeve të Diasporës së Izraelit shpenzoi 2 milionë dollarë për fushatën dhe punësoi grupin izraelit të marketingut politik Stoic për ta realizuar atë. FakeReporter nuk ishte në gjendje të konfirmonte se kush qëndronte pas grupeve që bënin komentet pro-izraelite, por Meta publikoi një raport të veçantë javën e kaluar duke pretenduar se STOIC qëndronte pas fushatës së dezinformimit dhe njoftoi se e kishte ndaluar kompaninë nga platformat e rrjeteve sociale./abcnews.al
