Udhëheqësi i shumicës republikane të senatit amerikan Mitch McConnell akuzoi presidentin Donald Trump, për provokimin e trazirave të 6 janarit në Kapitol.
“Turma u ushqye me gënjeshtra. Ata u provokuan nga presidenti dhe njerëz të tjerë të fuqishëm,” tha McConnell në një fjalim në Senat.
Dhoma e Përfaqësuesve të mërkurën e kaluar ngriti për herë të dytë akuza në fillim të një procesi për shkarkimin e presidentit Trump. Senati ende nuk ka planifikuar datën e një gjyqi për të përcaktuar fajësinë ose jo të Trump.
McConnell javën e kaluar tha se në gjyqin e Senatit ai do të dëgjonte argumentet e paraqitura përpara se të vendoste se si të votohej për akuzën e ngritur nga Dhoma e Përfaqësuesve: nxitjen e një rebelimi që rezultoi në rrethimin e Kapitolit.
Udhëheqësi i demokratëve të Senatit Chuck Schumer, i cili në ditët e ardhshme do të bëhet udhëheqës i shumicës së Senatit, tha në një fjalim në Senat se Trump “është kërcënim për rendin tonë kushtetues pavarësisht nëse është në pushtet ose jo.”
Mandati i Trump si president përfundon të mërkurën kur Presidenti i zgjedhur Joe Biden të bëjë betimin. Schumer shtoi se nëse Trump shpallet fajtor, Senati do të votonte për ta ndaluar të kandidojë përsëri për president.
Mbështetësit e Trump sulmuan Kapitolin në 6 janar, duke e vonuar me disa orë procesin e certifikimit të fitores së Biden në zgjedhjet e nëntorit dhe duke i detyruar ligjvënësit të kërkonin mbrojtje. Sulmi rezultoi në vdekjen e pesë personave, përfshirë një oficer të policisë së Kapitolit./abcnews.al
