Emigrantë të shumtë kanë humbur jetën pasi varka me të cilën po lundronin në ujërat e Mesdheut është përmbysur. Ngjarja ka ndodhur në brigjet e Tunizisë, autoritetet e të cilës kanë deklaruar se viktimat janë rreth 70 dhe se varka me të cilën po udhëtonin ishte nisur nga Libia. Marina tuniziane u ka ardhur në ndihmë 16 të mbijetuarve, ndërsa po vijon kërkimet për trupat e pajetë. Emigrantët dyshohet se ishin nga vendet e Afrikës nën-Sahariane.
Disa mijëra emigrantë përpiqen çdo vit të kalojnë Mesdheun për të arritur Europën, por shpesh herë udhëtojnë me mjete të vjetra dhe të tejmbushura, ndaj dhe shumë prej tyre humbin jetën. Një raport i OKB-së i publikuar në janar thoshte se të paktën 6 emigrantë në ditë kanë humbur jetën gjatë 2018-s në përpjekje për të arritur kontinentin e vjetër./ABC News Albania 24/7
