Ambasadori i Bashkimit Evropian në Shqipëri Luigi Soreca ka vizituar qendrën e votimit të vendosur tek Liceu Artistik në Tiranë ndërsa procesit të votimit i afrohet ora e mbylljes. Duke folur me anëtarët e komisionit, ambasadori u shpreh se faza e parë është tashmë drejt mbylljes, ndërsa tashmë nis një fazë e dytë e rëndësishme, ajo e numërimit.
“Jemi thuajse në fund. Tani përfundon faza e parë, dhe pastaj fillon faza e dytë e rëndësishme e numërimit. Puna juaj përfundon këtu? Shumë mirë. Më vjen mirë që do të shoh mbylljen këtu,” u shpreh Soreca.
Po ashtu, ambasadori i BE-së deklaroi se kjo ishte një ditë e mirë për demokracinë ndërsa shtoi se shqiptarët mesa duket e kanë ndjerë me përgjegjshmëri rëndësinë e kësaj dite.
“Kjo ka qenë një ditë e mirë për demokracinë, pashë shumë shqiptarë që morën pjesë në proces. Pata ndjesinë se e kanë ndjerë përgjegjësinë e rëndësinë e kësaj dite. Pata mundësi që të flsija me votuesit, të rinj e të moshuar. Ndjeva një angazhim që më ka lënë mbresë. Tani të shohim tek orët e tjera. Është e rëndësishme që të jemi të duruar, të presim me qetësi, dhe më e rëndësishmja që ta respektojmë rezultatin.”
Nga ana tjetër, ambasadorja amerikane Yuri Kim ndodhet në Elbasan ku është shfaqur duke biseduar me disa qytetarë në qendër të qytetit. sb/abcnews.al/
