Mbledhja në selinë blu, zbardhet kërkesa e Vokshit për Alibeajn

Në selinë blu vijon që prej orës 09:00 mbledhja e grupit parlamentar. Mbledhja është thirrur nga kreu i grupit, Enkelejd Alibeaj, para nisjes së seancës plenare në Kuvend.

Pritet që grupi të vendosë mbi qëndrimin që do të mbajnë për negociatat me maxhorancën për zgjedhjen e presidentit të ri.

Sakaq, gjatë diskutimeve Albana Vokshi i ka kërkuar Enkelejd Alibeajt që të bëjë kërkesë në Kuvend për pesë deputetët e përjashtuar. Siç mëson gazetari Juxhin Mustafaraj nga burime brenda mbledhjes me dyer të mbyllura, Vokshi kërkon që deputetët e përjashtuar në janar të cilësohen si pjesë e grupit parlamentar të PD-së. “Jemi 5 deputetë të përjashtuar. Duhet të bëni kërkesën në Kuvend”, ka thënë Vokshi.

Ndërsa, Alibeaj është përgjigjur: “Znj.Vokshi nuk bej dot unë me vullnet personal vendime që janë marrë nga organe të partisë.”

Nga ana tjetër, sot pritet me interes se cili do të jetë qëndrimi i ish-kryeministrit Sali Berisha dhe mbështetësve të tij në Komisionin e Rithemelimit. Berisha është shprehur më herët se nuk do të marrë pjesë në bisedimet për të zgjedhur kreun e shtetit, duke e cilësuar si farsë të kryeministrit Edi Rama.

Po ashtu pritet edhe qëndrimi që do të mbajnë edhe deputetët e tjerë. I pyetur më herët nëse do të marrë pjesë në tryezën e PS për presidentin, Enkelejd Alibeaj ka deklaruar se kjo do të vendoset në grupin parlamentar.

Deputetët që janë paraqitur deri tani në mbledhje janë:

Dhurata Cupi

Tritan Shehu

Luan Baci

Seladin Jakupllari

Zef Hila

Ramadan Likaj

Flamur Noka

Zheni Gjergji

Bujar Leskaj

Isuf Cela

Enkelejd Alibeaj