Italia luan në Amsterdam përballë Holandës nesër në mbrëmje (20:45). Kombëtarja e kaltër e nisi me një barazim 1-1 në shtëpi kundër Bosnjes edicionin e dytë të Nations League, teksa e pret një përballje edhe më e vështirë.
Roberto Mancini nuk ka frikë dhe karikon ekipin në konferencën për shtypin. Trajneri i Italisë ndalet edhe te dyshja Nicolo Zaniolo dhe Moise Kean, të cilët i vlerëson shumë për rritjen që kanë bërë kohët e fundit.
“Shpresojmë të luajmë një ndeshje të mirë si ajo kundër Bosnjes, edhe pse nuk ia dolëm të t’i bënim me sukses disa gjëra. Duhet të futemi në fushë me bindjen për të fituar ndeshjen.
Do të ishte më mirë t’i luanim në tetor këto sfida, na vjen keq për mungesën e tifozëve në stadium. Zaniolo dhe Moise Kean janë rritur shumë dhe shpresoj të vazhdojnë kështu. Janë në rrugën e duhur për të bërë të lumtur ne dhe klubet e tyre“, deklaron Mancini. /abcnews.al
