Është përcjellë për në banesën e fundit nga një grusht njerëzish arkitekti dhe piktori i shquar Maks Velo. Varrimi i tij u bë në Tufinë, i shoqëruar nga shumë pak persona, siç e kërkojnë rregullat e luftës kundër koronavirusit.
Në këtë periudhë Pandemie, ai nuk mundi të ketë një ceremoni varrimi si të tjerat, rrjedhimisht Ministria e Kulturës organizoi një ceremoni nderimi duke thënë se kushdo që donte ta nderonte atë mund të dërgonte buqeta me lule në ambientet e Ministrisë.
Lexo edhe: DOKUMENTI SEKRET/ Tragjedia e Maks Velos, si u spiunua nga gruaja dhe vjehrra austriake
Maks Velo u nda nga jeta në moshën 84-vjeçare, ditën e djeshme pas një sëmundje të rëndë.
Maks Velo ishte piktor, arkitekt, studiues dhe shkrimtar. Ai vuajti denimin në burgje gjatë regjimit komunist dhe një pjesë e krijimtarisë së tij i është dedikuar dimensionit të lirisë në diktaturë. Gjatë viteve të fundit mori pjesë gjerësisht në debatet për menaxhimin e hapësirës publike përmes artikujve publicistikë dhe aktiviteteve të tjera
Maks Velo lindi në Paris, më 31 gusht të vitit 1935. Pas lindjes së tij, familja Velo u kthye përsëri në Shqipëri, në qytetin e Korçës, ku Maksi ka kaluar edhe fëmijërinë.
Vendi i origjinës së prindërve ishte Dardha. Pasi mbaron gjimnazin, ai vazhdon studimet pranë Institutit Politeknik, në degën e Inxhinierisë së Ndërtimit. Më pas specializohet për arkitekturë dhe në vitin 1960 merr pjesë në projektimin e parë që u bë në Tiranë. Ka punuar më tej pranë byrosë së projektimit të Tiranës. Pastaj, vitet ’78-’79 përkojnë edhe me periudhën më të vështirë të jetës së tij, pasi gjatë kësaj kohe, ai arrestohet dhe dënohet me dhjetë vjet burg.
Maks Velo është autor i një sërë botimesh si: “Kokëqethja”, “Palltoja e burgut”, “Thesi i burgut”, “Paralele për arkitekturën”, “Kohë antishenjë”, “Betonizimi i demokracisë”, “Hetimi”, “Spaçi”, “Jeta ime në figura”, “Klubi Karavasta” “Përkthyesi”, “Jetë paralele”, etj. Si artist, ai krijon në disa gjini të artit: pikturë, prozë, poezi, publicistikë sikundër është i angazhuar në çështje të aktualitetit shqiptar. /abcnews.al
