Presidenti francez Emmanuel Macron ka pranuar se duhet të ishte më i “përfshirë” në mbrojtjen e reformës së pensioneve, pasi protestat kundër saj vazhdojnë edhe pse është miratuar tashmë.
Që prej muajit janar, pas prezantimit të këtij plani, i cili do të rriste moshën e daljes në pension në 64 vjeç, presidenti francez është “mbyllur” në Pallatin Elysee dhe ka bërë pak udhëtime brenda vendit.
“Ndoshta gabimi është se nuk isha mjaftueshëm i pranishëm,” tha ai në një bisedë në internet me lexuesit e gazetës Le Parisien këtë mbrëmje. “Më duhet të angazhohem sërish në debatin publik sepse ka disa gjëra që ende nuk janë të qarta”, shtoi ai.
Macron po përpiqet të kthejë krizën e reformës së pensioneve, por pothuajse çdo herë që udhëton në Francë ai përballet me protestues të zemëruar. Krahas demonstratave të organizuara nga sindikatat, thuajse çdo ditë ka edhe “koncerte” spontane me tenxhere. Protestuesit nuk ngurrojnë t’i thërrasin “Macron, dorëhiqu”.
“Zemërimi i shprehur nga francezët nuk do të më ndalojë të vazhdoj turneun”, tha presidenti javën e kaluar.
Sipas një sondazhi të institutit Ifop për gazetën Journal du Dimanche, pothuajse tre në katër francezë thonë se janë të pakënaqur me Macron, popullariteti i të cilit ka rënë në 26%. /abcnews.al
