Presidenti i Bjellorusisë Aleksandr Lukashenko ka ftuar mercenarët e grupit Wagner në vendin e tij për të trajnuar ushtrinë e tij. Lukashenko aludoi për ftesën në një fjalim të premten kushtuar Ditës së Pavarësisë së Bjellorusisë, sipas agjencisë shtetërore të lajmeve Belta.
“Për fat të keq, mercenarët e Wagnerit nuk janë këtu”, tha Lukashenko. “Dhe nëse drejtuesit e tyre, siç u thashë tashmë, vijnë dhe na japin përvojën e tyre luftarake, ne do ta pranojmë këtë përvojë.”
Ftesa nga Lukashenko vjen vetëm një javë pasi liderit bjellorus iu njoh merita për fundin e një kryengritjeje të armatosur nga forcat Wagner kundër Moskës.
Në një seri ngjarjesh mahnitëse që përbënin kërcënimin më të madh për presidentin rus Vladimir Putin në vite, lideri i Wagner-it Yevgeny Prigozhin kishte marshuar forcat e tij drejt kryeqytetit rus, duke marrë kontrollin e objekteve ushtarake në dy qytete ruse, në atë që ai tha se ishte një përgjigje ndaj një sulmi ushtarak rus në një kamp të Wagner.
Kriza u qetësua vetëm pasi Lukashenko ndërmjetësoi një marrëveshje sipas së cilës Prigozhin do të transferohej në Bjellorusi.
Si pjesë e së njëjtës marrëveshje, trupave të Wagner-it iu dha mundësia që të regjistroheshin në ushtrinë ruse ose agjencitë e zbatimit të ligjit, të ktheheshin te familja dhe miqtë e tyre, ose të shkonin në Bjellorusi.
Në fjalimin e tij të premten, Lukashenko tha se nuk kishte frikë nga anëtarët e grupit Ëagner pasi i njihte ata prej kohësh.
“Këta janë njerëz që luftuan në të gjithë botën për të krijuar një qytetërim normal. Perëndimi i urren ata deri në palcë”, tha ai.
Ai paralajmëroi gjithashtu se po afrohej një “krizë ushtarako-politike në shkallë botërore e paprecedentë në historinë e njerëzimit”.
/abcnews.al
